Azərbaycan, Bakı, 30 aprel /Trend, müxbir Ə.Həsənov/
İqtisadi Əməkdaşlıq Təşkilatına (İƏT) üzv ölkələrin ticarətin təşviqi üzrə təşkilatlarının rəhbərlərinin ikinci iclası 2012-ci il mayın 2-3-də Bakıda keçiriləcək.
İclasın keçirilməsində məqsəd iştirakçılar arasında funksiyalar və fəaliyyət haqqında informasiya mübadiləsi prosesinin artırılmasıdır. Trend-in məlumatına görə, bu barədə Azərbaycanda İxracın və İnvestisiyaların Təşviqi Fondunun (AZPROMO) saytında dərc olunmuş məlumatda deyilir.
Tədbirin təşkilatçısı AZPROMO-dur.
"Bu görüş regiondaxili ixracat imkanları üçün platforma yaradacaq, təbliğat sahəsində məhsulun və əməkdaşlığın diversifikasiyası, müəssisələr arasında əlaqələrin qurulması, həmçinin, "promotion" üçün tədbirlərin keçirilməsi üzrə planları bölüşməyə, ixracın stimullaşdırılması üzrə birgə tədbirlər hazırlamağa imkan verəcək", - məlumatda qeyd olunur.
