Azərbaycan, Bakı, 12 iyul /Trend, müxbir A.Axundov/
Azərbaycanda stajdan asılı olaraq pensiyanın baza hissəsinə əmsalların tətbiqi mümkündür ki, bu da işçilərin əmək fəaliyyətlərini qanuniləşdirməyə marağını artıracaq.
Trend-in məlumatına görə, bu barədə cümə axşamı jurnalistlərə Azərbaycan Dövlət Sosial Müdafiə Fondunun (DSMF) sədri Səlim Müslümov bildirib.
"Köhnə pensiya hesablama sistemimizə əsasən, kişinin 25 illik stajı, qadının isə 20 illik stajı olanda ödənilmiş əməkhaqqı tam həcmdə alınırdı. Əgər staj aşağı olardısa, daha az alırdılar. Hazırda vətəndaşların əmək fəaliyyətlərini qeydiyyata almalarında maraqlı olmaları üçün buna bənzər qayda tətbiq etməyə ehtiyac var", - Müslümov deyib.
Onun sözlərinə görə, bu, qanunsuz əmək fəaliyyəti və işəgötürənlərin öz işçilərinin əməkhaqlarının real məbləğini gizlətməsi ilə mübarizə üzrə tədbirlərdən biridir.
"Qanunsuz məşğulluq və əməkhaqqının real həcminin gizlədilməsinə qarşı radikal addımlar atmaq üçün yaxın günlərdə hökumətə sosial sığorta və əmək pensiyaları haqqında qanuna dəyişikliklərin edilməsinə dair təkliflərimizi təqdim edəcəyik", - Müslümov qeyd edib.
DSMF sədri, həmçinin pensiyanın baza hissəsinin tam ləğvinin mümkünlüyünü istisna etməyib.
"Digər variant da var. Bu, pensiyanın baza hissəsinin tam ləğvindən ibarətdir. Yəni sosial sığorta üzrə yığımların 100 faizini fərdi hesablara ayırmaq və bu məbləği 144 yerə (12 il ərzində ayların sayı) bölərək pensiya formalaşdırmaqdır. Nəzərdən keçirdiyimiz müxtəlif variantlar var", - o vurğulayıb.