Azərbaycan, Bakı, 26 aprel /Trend, müxbir A.Axundov/
Azərbaycan Beynəlxalq Bankı (ABB) islam lizinqi üzrə məhsulların fəal şəkildə təqdim edilməsinə başlayıb. Trend-in məlumatına görə, bu barədə cümə günü jurnalistlərə bankın İdarə heyətinin sədri Cahangir Hacıyev deyib.
"İslam maliyyə mənbələrindən cəlb edilmiş vəsaitlərin həcmi 60-70 milyon dollara çatıb. Eyni zamanda, lizinq şirkətimiz (Joint Leasing) vasitəsilə islam lizinqi üzrə məhsulları fəal şəkildə təqdim edirik", - Hacıyev bildirib.
Onun sözlərinə görə, bank ölkədə islam bankçılığı üçün qanunvericilik bazasının yaradılması məqsədilə beynəlxalq maliyyə institutları ilə birgə bank qanunvericiliyinə dəyişikliklər edilməsinə dair təkliflər hazırlayır.
"Bu iş yekunlaşdıqdan sonra Mərkəzi Bank qarşısında təşəbbüslə çıxış edəcəyik. Bank fəaliyyətinin bu növü ölkədə qadağan edilməyib, eyni zamanda, tənzimlənmir. Bizdə tətbiq edilməli olan beynəlxalq praktika mövcuddur", - Hacıyev qeyd edib.