Bişkek. Trend:
Mərkəzi Asiya Beynəlxalq Ticarət Palatasının prezidenti Maksat Çakiyev Bişkekdə keçirilən ŞƏT-in Media və Analitik Mərkəzlər Forumunun plenar iclasında təşkilata üzv dövlətlər arasında iqtisadi əməkdaşlığın genişləndirilməsinə yönəlmiş bir sıra təkliflər irəli sürüb.
Trend-in xüsusi müxbirinin xəbərinə görə, forum iştirakçıları qarşısında çıxış edən Maksat Çakiyev vurğulayıb ki, müasir qlobal çağırışlar şəraitində siyasi etimad ticarətin, investisiya fəaliyyətinin və nəqliyyat əlaqələrinin inkişafını stimullaşdıran səmərəli iqtisadi mexanizmlərdə öz praktik əksini tapmalıdır.
Onun sözlərinə görə, dünya iqtisadiyyatı hazırda artan qeyri-sabitlik dövrünü yaşayır – logistika zəncirləri pozulur, ticarət maneələri güclənir, ənənəvi marşrutlar isə etibarlılığını qismən itirir. Belə şəraitdə ölkələr arasında etimad dayanıqlı iqtisadi inkişaf üçün əsas amilə çevrilir.
Mərkəzi Asiya Beynəlxalq Ticarət Palatasının prezidentinin təkliflərindən biri region dövlətləri və tərəfdaş ölkələrin nəqliyyat dəhlizlərini, istehsal zəncirlərini, enerji infrastrukturunu və maliyyə mexanizmlərini birləşdirəcək Mərkəzi İqtisadi Məkanın yaradılması olub.
Bundan əlavə, Maksat Çakiyev ŞƏT-in Beynəlxalq Ticarət və İnvestisiya Palatasının yaradılması təşəbbüsü ilə çıxış edib. Onun fikrincə, belə bir qurum təşkilata üzv dövlətlərin milli və regional ticarət palatalarını, biznes assosiasiyalarını və şirkətlərini bir araya gətirərək ticarət-iqtisadi və investisiya əməkdaşlığının əlaqələndirilməsi üçün daimi platformaya çevrilə bilər.
"ŞƏT-in Beynəlxalq Ticarət Palatası biznes ictimaiyyətinin qarşılıqlı fəaliyyətinə və birgə iqtisadi layihələrin həyata keçirilməsinə dəstək verən praktik və operativ platformaya çevrilməlidir", – deyə Maksat Çakiyev bildirib.
Qeyd edək ki, ŞƏT-ə üzv dövlətlərin Media və Analitik Mərkəzlərinin Forumu ilk dəfə olaraq Bişkekdə keçirilir. Tədbirin təşkilatçıları Qırğızıstan Milli İnformasiya Agentliyi "Kabar" və Çinin "Sinxua" İnformasiya Agentliyidir. Forumun işində 26 ölkədən, o cümlədən aparıcı informasiya agentliklərinin rəhbərləri, jurnalistlər, analitik mərkəzlərin, elmi müəssisələrin, dövlət qurumlarının və beynəlxalq təşkilatların nümayəndələri daxil olmaqla, 250-yə yaxın nümayəndə iştirak edir.
Görüşün əsas mövzusu "ŞƏT yeni dövrdə: qarşılıqlı anlaşmadan praktik əməkdaşlığa doğru" adlanır.
Plenar iclaslar və tematik müzakirələr çərçivəsində iştirakçılar beynəlxalq informasiya əməkdaşlığının inkişafı, medianın rəqəmsal transformasiyası, humanitar əməkdaşlıq və qlobal informasiya məkanının aktual çağırışlarını müzakirə edirlər.
