Azərbaycan, Bakı, 14 avqust /Trend, müxbir A. Axundov/
2013-cü ilin birinci yarısında Azərbaycanın bank sektorunun dərinləşməsi davam edib.
Azərbaycan Mərkəzi Bankının (AMB) çərşənbə günü saytında yerləşdirdiyi maliyyə sabitliyi hesabatına əsasən, son beş ildə bank sektorunun aktivləri ÜDM-ə nisbətən 40 faiz bənd artıb və 67 faizə çatıb.
Daha əvvəl AMB-nin İdarə Heyətinin sədri Elman Rüstəmov bildirib ki, Mərkəzi Bank yaxın 10 ildə bu göstəricinin 100 faizə qədər artacağını gözləyir.
Cari ilin birinci yarısında bank sektorunun aktivləri 1,66 milyard manat və ya 10 faiz arataraq 18,19 milyard manata çatıb.
Bank aktivlərinin 74 faizini təşkil edən kreditlərin həcmi ilin əvvəlindən 12,5 faiz artaraq 13,42 milyard dolara çatıb. Bankların maliyyə və qeyri-maliyyə sektorundan cəlb etdikləri vəsaitlər 1,9% azalsa da, fiziki şəxslərin əmanətləri yanvar-iyun ayları ərzində 15,8% artaraq 5 922,2 mln. manata çatıb.