Azərbaycan, Bakı, 13 noyabr /Trend, müxbir E.Əliyev/
Azərbaycanda aqrar texnoparkların yaradılması məqsədəuyğun olardı. Trend-in məlumatına görə, bu barədə çərşənbə günü Milli Məclisin Aqrar siyasət komitəsinin sədri Eldar İbrahimov 2014-cü il büdcə zərfinin müzakirələri zamanı deyib.
Millət vəkili qeyd edib ki, hökumət kənd təsərrüfatında emal müəssisələrinin yaradılmasına və inkişafına maliyyə dəstəyi göstərməlidir ki, bu da ölkənin ixrac potensialını genişləndirməyə imkan verəcək.
Onun sözlərinə görə, gələn il Azərbaycanda aqrar sənaye komplekslərinin maliyyələşdirilməsi təqribən 16 faiz artırılaraq 539 milyon manata çatacaq: "Bu həcmin 131 milyon manatını fermerlərə veriləcək subsidiyalar təşkil edəcək".
E.İbrahimov bildirib ki, ölkədə kənd təsərrüfatı məhsullarının istehsalçıları üçün vergi güzəştləri növbəti dəfə uzadılacaq. Ölkədə sənaye parkların və texnoparkların fəaliyyəti üçün vergi və gömrük güzəştləri tətbiq ediləcək.
