...

SOCAR istiqrazlarının qiymətlərinin yüksəlməsi gözlənilir

Biznes və iqtisadiyyat xəbərləri Materials 22 Dekabr 2017 16:25 (UTC +04:00)
İstiqrazlar üzrə növbəti ödənişə (17 yanvarda olacaq) qədər qiymətlərin bir qədər də yüksəlməsi gözlənilir.
SOCAR istiqrazlarının qiymətlərinin yüksəlməsi gözlənilir

Bakı. Trend:

Dekabrın 21-də Bakıda «AzFinance» İnvestisiya Şirkətinin təşkilatçılığı ilə keçirilən “Kapital Bazarları 2018” tədbiri ölkənin qiymətli kağızlar bazarı və maliyyə alətləri ilə bağlı maraqlı açıqlamalarla yadda qalıb.

"SOCAR Capital"dan Trend-ə verilən məlumata görə, tədbirdə «Daxili bazarda yeni çağırışlar» mövzusunda təqdimat edən «AzFinance» İnvestisiya Şirkətinin direktor müavini İntiqam Səfərəliyev bildirib ki, hazırda təkrar bazarda ən çox əməliyyat aparılan qiymətli kağız SOCAR İstiqrazıdır. İ.Səfərəliyev çıxışına konfrans iştirakçılarına ünvanlanmış sualla başlayıb: «Məni ilk növbədə bir sual maraqlandırır - SOCAR İstiqrazları olmasaydı, dollarda olan vəsaitləri belə şərtlərlə hara yerləşdirəcəkdiniz? Kimdə bu suala cavab var? Heç kimdə yoxdur. Bu yaxşı bir alət idi və kapital bazarının iştirakçıları bunu lazımınca qiymətləndirdilər».

İ.Səfərəliyev bildirib ki, ölkə iqtisadiyyatında şəffaflığın artırılması ilə bağlı ən təsirli yollardan biri də qiymətli kağızlar bazarına üz tutan şirkətlərə vergi güzəştlərinin verilməsi ola bilər: «Belə olarsa, şirkətlər vergi güzəştindən istifadə etmək üçün qiymətli kağızlar bazarına üz tutacaq, və bazarının tələblərinə görə, şəffaf olmağa başlayacaqlar».

Qiymətli kağızlar bazarında çeviklik və ani qərar vermənin mühüm əhəmiyyət daşıdığını qeyd edən direktor müavini bildirib ki, bəzi şirkətlər vaxtında düzgün qərar vermədiyindən, əldə edə biləcəkləri gəliri itirirlər: «Kapital bazarında çevik və yeni fikirlərə açıq olmalısınız. Əks halda gecikəcəksiniz və proseslərə yalnız qiymət artandan sonra reaksiya verəcəksiniz».

İ.Səfərəliyev buna misal kimi SOCAR İstiqrazlarını göstərib. Onun sözlərinə görə, vaxtilə istiqrazlara inamsız yanaşanlar hazırda bazarda onu yüksək qiymətə almağa çalışırlar: «Vaxtilə SOCAR İstiqrazlarının işləməyəcəyini düşünənlər, indi onları daha baha qiymətə almaq məcburiyyətində qalıblar və yəqin ki, onun qiyməti bir qədər də qalxacaq».

Xatırladaq ki, SOCAR İstiqrazları 2016-cı ilin oktyabrında 100 milyon dollar həcmində buraxılıb. İstiqrazların nominal qiyməti 1.000 ABŞ dolları, illik gəlirliliyi 5% təşkil edir. SOCAR-ın ilk dəfə tətbiq etdiyi geri alım zəmanəti sayəsində istiqrazları istənilən vaxt satmaq mümkündür. Bu fakt SOCAR İstiqrazlarına böyük marağı təmin edib və nəticədə, hazırda istiqrazlar Azərbaycanın qiymətli kağızlar bazarında ən çox alınan maliyyə alətidir. İstiqrazlara böyük maraq nəticəsində onların qiyməti artaraq, 1020–1026 dollara çatıb. İstiqrazlar üzrə növbəti ödənişə (17 yanvarda olacaq) qədər qiymətlərin bir qədər də yüksəlməsi gözlənilir.

Məqalədə:
Xəbər lenti

Xəbər lenti