Bakıda BAKU MEBEL - 2005 3-cü beynəlxalq mebel, interyer və dizayn sərgisi öz işinə başlayıb. Trend in məlumatına görə, tədbirin rəsmi açılışında bir sıra rəsmi şəxslər, o cümlədən Azərbaycanın Sənaye-Ticarət palatasının vitse-prezidenti Mehman Əhmədov, xarici ölkələrin Azərbaycandakı səlahiyyətli nümayəndələri iştirak ediblər.
Heydər Əliyev adına idman kompleksində keçirilən sərginin işində Almaniya, Polşa, İtaliya, Azərbaycan və başqa ölkələrdən 30 şirkət iştirak edir.
Rəsmi açılışda çıxış edən Iteca Caspian Ltd. Şirkətinin direktor müavini Bəhruz Hidayətzadə qeyd edib ki, əvvəlki illərlə müqayisədə Azərbaycan müəssissələrinin sayı xeyli artıb. "Hazırda mebel məmulatları, əsasən, bu şirkətlər tərəfindən sərgiyə qoyulur, xarici şirkətlər isə mebel istehsalı üzrə müxtəlif avadanlıqların sərgisini keçirir", - deyə o bildirib.
Sərgidə əsasən, ofis, bank, ictimai müəssisələr və ticarət zalları, mehmanxana kompleksləri, restoran və əyləncə mərkəzləri, xəstəxana və klinika, təhsil müəssisələri, kitabxanalar üçün mebellər, mebel istehsalı üçün avadanlıq və alətlər, furnitur və aksessuarlar, üzləmə materialları, fasadlar, laklar, boyalar, yataq ləvazimatları, güzgülər, şüşə məmulatları, incəsənət əsərləri nümayiş etdirilir.
Sərginin təşkilatçıları Britaniyanın ITE Group PLC şirkəti və onun Azərbaycandakı tərəfdaşı Iteca Caspian Ltd şirkətidir.
Sərginin keçirilməsinə İqtisadi İnkişaf Nazirliyi, İnşaat və Memarlıq üzrə Dövlət Komitəsi, Azərbaycanın Ticarət-Sənaye Palatası, həmçinin, İxrac və İnvestisiyaların Təşviqi Fondu tərəfindən rəsmi dəstək göstərilib.