Qara dəniz Ticarət və İqtisadi Bankının Bidarəetmə Şurasının illik 8-ci iclasının 2006-cı il iyunun 11-də Bakıda keçirilməsi planlaşdırılıb. Bu barədə Trend ə hökumətdən məlumat verilib. Bankın 2005-ci ilin iyununda nümayəndəliyinin ölkəmizdə yaradılması ilə əlaqədar illik iclas ilk dəfə Bakıda keçiriləcək. İclasdan bir gün sonra, yəni iyunun 12-də Qara dəniz ölkələrinin biznes-forumu keçiriləcək.
Nəzərdə tutulmuş tədbirlə əlaqədar ölkə prezidentinin sərəncamı ilə iqtisadi inkişaf naziri Heydər Babayevin sədrliyi ilə təşkilat komitəsi yaradılıb. Dövlət Neft Fondunun rəhbəri və Qara dəniz Ticarət və İqtisadi Bankının Azərbaycandan olan direktoru Samir Şərifov onun müavini təyin edilib.
Azərbaycan Qara dəniz Bankının onun yaradıldığı 1997-ci ildən üzvüdür. Hazırda Qara dəniz Bankı ilə Azərbaycan arasında əməkdaşlıq 2005-ci ilin martında Bankın Direktorlar Şurasının təsdiqlədiyi strategiya əsasında qurulur. Yeni strategiya 3 il üçün nəzərdə tutulsa da' orada maliyyələşdirmənin həcmi göstərilməyib. Maliyyələşdirmənin həcmi həm də ölkənin üzvlük haqlarının ödənilməsi ilə bağlı üzərinə götürdüyü öhdəliklərin yerinə yektirilməsindən də asılıdır. Yeri gəlmişkən, strategiyada maliyyələşdirmənin istiqamətləri - bank sektoru, infrastruktur layihələr (kommunikasiya, transport və s..) müəyyən edilib. Buna baxmayaraq, Qara dəniz Bankı üstünlüyü bank sektoruna verir.
