Azərbaycan, Bakı/ Trend müxbir İ.Xəlilova/ Xarici İşlər Nazirliyi Azərbaycanın xaricdəki diplomatik nümayəndələrinə qeyri-neft sektoru məhsullarının ixrac olunması üçün bazarları öyrənmək tapşırığı verib. Bu barədə xarici işlər nazirinin müavini Mahmud Məmmədquliyev məlumat verib.
"Bu gün ərəb ölkələri (məsələn, İordaniya) Azərbaycandan ət məhsullarının idxal olunmasında maraqlıdır. Amma biz bu məhsulun tədarükçüləri haqda məlumata malik deyilik. Bununla yanaşı, yerli şirkətlər keyfiyyət standartlarına əməl etməlidirlər ki, xarici bazarlar onların məhsullarını qəbul etsin",-deyə Məmmədquliyev söyləyib.
Yerli istehsalçılara yardım etmək və onların satış bazarını genişləndirmək məqsədilə XİN yerli müəssisələr haqqında bütün məlumatların, onlar tərəfindən istehsal olunmuş malların nomeklaturasının əks olunduğu kataloq hazırlamağı təklif edir.
Nazir müavininin sözlərinə görə, bu cür məcmuəni Nazirlik yerli ixracatçılara xarici partnyorlar tapılmasına yardım etmək üçün diplomatik nümayəndəliklər arasında yaya bilər.
