Azərbaycan, Bakı / Trend / Azərbaycanın "Meliorasiya və su təsərrüfatı" ASC meliorasiya və su təsərrufatının inkişafı ilə bağlı milli proqram hazırlayıb. Bu barədə "Respublika" qəzetinə ASC-nin sədri Əhməd Əhmədzadə məlumat verib.
Proqram 2007-2015-ci illəri əhatə edir və özündə meliorasiya və su təsərrüfatı obyektlərinin tikintisi ilə müşayət olunan yenidənqurma işlərini əks etdirir.
İşlər iki mərhələdə həyata keçiriləcək:
- layihələri hazır olan obyektlərin inşasının yekunlaşdırılması və yenilərin yaradılması;
- suvarma ərazilərinin həcminin genişləndirilməsi üçün yeni layihələrin reallaşdırılması.
Proqram çərçivəsində 722 mln. kubmetrlik 16 su anbarının və uzunluğu 825 kilometr olan suvarma kanallarının tikintisi planlaşdırılır. Konkret olaraq istifadəyə 43,4 hektar suvarma ərazilərinin verilməsi, 385 min hektar ərazidə yerləşən torpaqların su təchizatını və meliorasiya durumunun yaxşılaşdırılması, habelə 362 min hektarlıq ərazidə suvarma drenaj şəbəkəsinin yenidən qurulması nəzərdə tutulur.