Azərbaycan, Bakı /müx. Trend İ.Xəlilova / İyulun 25-26-da Azərbaycan hökuməti və Asiya İnkişaf Bankı arasında Multitranche Financing Facility (MFF) çərçivə sazişi və Masallı-Astara avtomagistralının bir hissəsinin bərpası layihəsi üzrə kredit müqaviləsilə bağlı rəsmi danışıqlar ardıcıl olaraq Bakıda keçiriləcək. Azərbaycanın Nəqliyyat Nazirliyindən verilən məlumata görə, danışıqlar uğurla bitəcəyi təqdirdə əgər bu sahədə səlahiyyətlər əldə edilərsə, bu sənədlər Bakıda imzalanacaq. Azərbaycandan olan danışıq qrupuna baş nazirin müavini Abid Şərifov başçılıq edəcək. Direktorlar Şurası avqustun sonuna qədər 500 mln. dollar dəyərində olan multitranş paketini və layihə üzrə kredit müqaviləsini eyni zamanda təsdiq etməyi planlaşdırır. MFF-dən Masallı-Astara avtomobil yoluna 200 mln. dollar vəsait ayrılacaq.
Asiya Bankının kredit resursları hissə-hissə olmaqla (190 mln. dollar) bankın adi resurslarından (4 il güzəştli dövr və faiz dərəcəsi libor+0,6% olmaqla 24 illik müddətə), 10 mln. dollar isə güzəştli (güzəştli dövr 8 il və faiz dərəcəsi güzəştli dövrdə 1%, qalan dövrdə isə 1,5% olmaqla 32 il müddətinə) resurslardan ayrılacaq. Kreditin güzəştli hisssəsi avtomagistrala qoşulan ikinci kənd yollarının bərpası üçün nəzərdə tutulub. MFF çərçivəsində Asiya Bankı Masallı-Astara da daxil olmaqla üç yol layihəsini maliyyələşdirməyi planlaşdırır. Layihənin texniki - iqtisadi əsaslandırılması TERA Amerika şirkəti tərəfindən işlənib hazırlanır.
