Azərbaycan, Şəki / Trend müxbir E.Quliyev/ Dövlət Torpaq və Xəritəçəkmə Komitəsinin rayon və şəhər şöbələrinin işi yoxlanılacaq. Bu barədə Şəkidə keçirilən zona müşavirəsində komitə sədrinin müşaviri Rafiq Süleymanov məlumat verib. Onun sözlərinə görə, yoxlamaların əsas məqsədi torpaqdan istifadənin tənzimlənməsində qarşıya çıxan çətinliklərin həllinə nail olmaqdır. Süleymanov bildirib ki, torpaq islahatının növbəti mərhələsində ölkə əhalisinin qanuni istifadəsində olan fərdi yaşayış evi, həyətyanı və baş təyinatlı torpaqların onların mülkiyyətinə verilməsi istiqamətində işlər aparılacaq. Komitənin yerli şöbələrinin fəaliyyətindəki nöqsanlara toxunan Süleymanov deyib ki, onlar öz fəaliyyətində dönüş yaratmalıdırlar.
"Yerli şöbə rəhbərləri torpaqlardan səmərəli istifadə etməli, onun əsassız olaraq dövriyyədən çıxarılmasına yol verməməlidirlər" - deyə Süleymanov əlavə edib.
Şəki paytaxt Bakıdan 320 kilometr şimal-qərbdə yerləşir.
