Azərbaycan, Bakı/ Trend müxbir S.Əliyev/ Avqust ayında AZAL Dövlət konserni əsasən daxili reyslərdə və regional marşrutlarda istifadə olunacaq Fransanın ATR markalı altı təyyarəsindən birini alacaq. Bu barədə bazar ertəsi AZAL-dan məlumat verilib. İlin sonuna qədər Azərbaycana daha bir təyyarə gətiriləcək. 2008-ci ildə Azərbaycan bu tipli daha 4 hava gəmisi alacaq.
AZAL yeni fransız təyyarələrindən ilk növbədə Naxçıvan, Gəncə, Lənkaran və Zaqatalaya sərnişin daşınmasında istifadə etmək niyyətindədir. Dövlət konserni ATR şirkətinə iki ATR - 42-500S və dörd ATR - 72-500S markalı təyyarə sifariş verib. Müqavilənin ümumi məbləği təqribən 97,2 mln. dollardır. Bu, 50-70 sərnişinin yerləşdiyi balaca təyyarələr olacaq.
Altı təyyarənin əldə olunması Azərbaycana təyyarə parkını yeniləşdirməyə, Antonov və Tupolev təyyarələrini əvəz etməklə yeni regional marşrutlar yaratmağa imkan verəcək.
