Azərbaycan, Bakı, 01 dekabr/ Trend , müxbir E.İsmayılov/ SOCAR şirkətinin (Azərbaycan Dövlət Neft Şirkəti) "Bayıl limanı" Dəniz Qazma İşləri İdarəsi 2009-cu ilin əvvəlindən SOCAR tərəfindən müstəqil şəkildə istismar olunan "Günəşli" dəniz yatağında iki yüksəkdebitli qaz quyusu qazmağa başlayacaq. Bu barədə bazar ertəsi şirkətdəki mənbədən bildiriblər.
"Gələn il üçün işlər çoxdur, belə ki, yanvardan "Günəşli" yatağında iki quyunun qazma işləri başlanacaq", - deyə mənbə bildirib.
Yeni quyular "Günəşli-19" və "Günəşli-14" platformalarından qazılacaq. Hər iki quyunun planda nəzərdə tutulan dərinliyi 2800 metr təşkil edir. Nəzərdə tutulan debit hər bir quyudan təqribən 500 min kubmetr qaza bərabərdir.
SOCAR-ın Neft və Qaz İdarəsinin müdiri Rəhman Qurbanov əvvəllər bildirib ki, ARDNŞ tərəfindən müstəqil istismar olunan "Günəşli" yatağında ilin əvvəlindən 11 yeni yüksəkdebitli quyu istifadəyə verilib.
"Günəşli" köhnə yataqdır, hazırda bütün işlər qaz hasilatı üzrə stabil səviyyənin saxlanılmasına yönəldilib. "Günəşli" yatağını istismar edən "28 May" İdarəsinin (NQÇİ) bu il üçün qaz hasilatı üzrə müəyyən etdiyi planın yalnız 95-96 faizi yerinə yetiriləcək.
"Günəşli" SOCAR-ın müstəqil şəkildə istismar etdiyi ən iri neft-qaz yatağıdır. SOCAR tərəfindən hasil edilən neftin ümumi həcminin 60 faizi, qazın isə 70 faizi onun payına düşür. Yeni quyuların qazılması SOCAR-ın təsdiq etdiyi "Günəşli" dəniz neft-qaz yatağını istismar edən NQÇİ-nin 2008-2010-cu illər yeni inkişaf proqramı çərçivəsində həyata keçirilir. Proqram çərçivəsində neft hasilatının stabilləşdirilməsi və təbii qaz hasilatı həcminin artırılmsı planlaşdırılır.
Məqalə müəllifi ilə əlaqə ünvanı - [email protected]