Qazaxıstan, Astana, 24 fevral / Trend , K.Arınova/
"Qazaxıstanda neft-qaz sahəsinə əlavə sərmayələrin cəlb olunması üçün yeraltı sərvətlərdən istifadəyə hüquq verilməsinə dair müsabiqələrin keçirilməsinə qoyulan qadağa götürülməlidir", - bazar ertəsi Astanada Qazaxıstanın enerji və mineral resurslar naziri Sauat Mınbayev deyib.
"Bu il biz "Yeraltı sərvətlər və onlardan istifadə haqqında" qanunun yeni redaksiyasını qəbul etməliyik və qanunun qəbulundan sonra əlavə sərmayələrin cəlb olunması üçün yeraltı sərvətlərdən istifadəyə hüquq verilməsi üzrə müsabiqələrin keçirilməsinə qoyulan qadağanın götürülməsini mümkün hesab edirik", - Mınbayev deyib.
Nazir qeyd edib ki, onun rəhbərlik etdiyi qurum, bu məsələ ilə bağlı hökumətə müraciət edib və hazırda ona baxılır. "Yeraltı sərvətlərdən istifadə edənlərə qarşı obyektiv və birmənalı yanaşma üçün nazirlik, 2008-ci ilin yekunlarına əsasən, maliyyə öhdəliklərini yerinə yetirmə səviyyəsi 50-60 faiz olan müqavilələri dayandırmamağı təklif edib. "Əks halda, qorxuram ki, xeyli müqaviləni pozmalı olacağıq ki, bizim nöqteyi-nəzərimizdən indi bunu etmək olmaz", - enerji naziri qeyd edib.
O əlavə edib ki, bu məsələlər yaxın zamanlarda hökumətdə müzakirə ediləcək. "Onlarla bağlı son qərar hələ verilməyib", - Mınbayev bildirib.
Qazaxıstanda 2008-ci ildə yeraltı sərvətlərdən istifadə ilə bağlı öhdəliklərin yerinə yetirilməməsi səbəbindən 37 müqavilə pozulub. Müqavilə öhdəliklərinin pozulması ilə bağlı 153 bildiriş göndərilib. Sabit olaraq (70-100 faiz və çox) öz öhdəliklərini yeraltı sərvətlərdən istifadə edənlərin 80 faizi yerinə yetirir.
2007-ci ilin yekunlarına görə, fəaliyyətdə olan qanunvericlik çərçivəsində nazirlik tərəfindən lisenziya-müqavilə şərtlərini tam həcmdə yerinə yetirməyən yeraltı sərvətlərdən istifadə edənlərlə bağlı müqavilələrin birtərəfli şəkildə pozulması kimi addımlar atılıb. Ancaq pozulmuş müqavilələr üzrə məhkəmə araşdırmaları prosesində müəyyən edilib ki, cari qanunda yetərincə hüquqi boşluqlar və ona yenidən baxılması vacibdir.
Enerji və Mineral Resurslar Nazirliyi "Yeraltı sərvətlər və onlardan istifadə haqqında" qanunun yeni redaksiyasının parlamentin müzakirəsinə çıxarılması təşəbbüskarıdır.
Məqalə müəllifi ilə əlaqə ünvanı: [email protected]
