Azərbaycan, Bakı, 13 avqust / Trend /
"Yanvar-iyul aylarında "Azəri-Çıraq-Günəşli" (AÇG) yataqlar bloku və "Şahdəniz" yatağını işlədən ARDNŞ və xarici şirkətlər tərəfindən Azərbaycana 6,6 milyard kubmetr qaz verilib", - Neft Şirkətinin cümə axşamı yayılmış məlumatında deyilir.
Dövlətə verilən qazın 3,76 milyard kubmetri ARDNŞ-nin, qalan 2,85 milyard kubmetri isə AÇG və "Şahdəniz" yataqlarının payına düşüb.
İyulda dövlətə 814 milyon kubmetr qaz verilib ki, onlardan 493,6 milyon kubmetri ARDNŞ-nin, qalan 320,5 milyon kubmetr isə xarici şirkətlərin işlətdiyi yataqların payına düşüb.
AÇG-nin işlənməsi zamanı əldə edilən qaz ödəməsiz olaraq ARDNŞ-yə verilir. ARDNŞ-nin "Şahdəniz" yatağının işlənməsindən aldığı qazın bir hissəsi şirkətin müqavilədə göstərilən iştirak payına düşür, qalan hissəsi isə şirkət tərəfindən alınır.
"Bu il ARDNŞ dövlətə yeddi milyard kubmetr qaz vermək niyyətindədir ki, bu qaz da şirkətin müstəqil şəkildə işlətdiyi yataqlardan əldə ediləcək", - bir müddət əvvəl şirkətin prezidenti Rövnəq Abdullayev deyib.
AÇG yataqlar blokunda "Bakı-Tbilisi-Ceyhan" boru kəməri vasitəsilə ixrac edilən Azeri Light növlü neft və səmt qazı əldə olunur.
"Şahdəniz" yatağından sutkada 20-24 milyon kubmetr qaz hasil edilir. Bu il yataqdan doqquz milyard kubmetr qaz əldə etmək planlaşdırılır. Bu həcmlər Azərbaycan, Gürcüstan və Türkiyəyə satılacaq.
