Azərbaycan, Bakı, 01 sentyabr / Trend /
İranın emal şirkətinin direktoru Əli Xeyrəndiş bildirib ki, hazırda İran Çin və Cənubi Koreyanın iki şirkəti ilə maye qaz (LNG) daşıyan altı gəminin alınması üzrə danışıqlar aparır.
O deyib ki, onlardan başqa iki İran şirkəti də LNG nəqli prosesində iştirak etmək niyyətləri barədə bildiriblər. Məlumatı İranın MEHR agentliyi yayıb.
Xeyrəndiş bildirib ki, LNG-nin daşınması üzrə keçirilən sonuncu müzakirələr zamanı dəniz donanmasının yaradılması barədə razılıq əldə olunub.
"İran LNG" layihəsinin nizamnaməsinə əsasən maye qazın daşınması üzrə işlər İranın qaz emalı şirkəti tərəfindən həyata keçirilir", - Xeyrəndiş bildirib.
"Biz İranın qaz emalı şirkətinin, alıcıların və LNG daşınması ilə məşğul olan şirkətlərin iştirakı ilə konsern yaratmaq niyyətindəyik", - şirkətin direktoru bildirib.
Onun sözlərinə görə, İranın layihənin birinci və ikinci mərhələsində istehsal edilən LNG-nin daşınması üçün 12-14 gəmiyə ehtiyac var.
