Azərbaycan, Bakı, 28 oktyabr / Trend , müxbir K.Konırova/
Türkmənistan "Nabukko" layihəsinə görə Rusiya ilə münasibətlərini korlamaq istəməyəcək, amerikalı analitik, Ceymstaun Fondunun baş əməkdaşı Vladimir Sokor belə hesab edir.
Sokorun çərşənbə günü Astanada bildirdiyi kimi, "Nabukko" layihəsi əsasən Azərbaycan, İraq və Misir qazına istiqamətlənib. Onun sözlərinə əsasən, kiçik qaz həcmləri Mərkəzi Asiyadan və əsasən Türkmənistandan nəzərdə tutulub.
"Türkmənistan Rusiya ilə münasibətlərini "Nabukko" layihəsinin ona ayırdığı kiçik qaz həcmlərinə görə korlamaq istəməyəcək", - Sokor bildirib.
Dəyəri 7,9 mlrd. avro olan "Nabukko" kəməri ilə Xəzər regionu və Yaxın Şərqdən Aİ ölkələrinə qazın ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir. Layihənin iştirakçıları Avstriyanın OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botaş və Almaniyanın RWE şirkətləridir.
BP-nin məlumatlarına əsasən, Türkmənistanın 2009-cu ilin əvvəlində təsdiqlənmiş qaz ehtiyatları 7,94 trilyon kubmetr təşkil edib ki, bu da ümumdünya ehtiyatlarının 4,3 faizi deməkdir.
BP-nin məlumatına əsasən, ölkədə qaz hasilatı 2008-ci ildə 66,1 milyard kubmetr təşkil edib ki, bu da 2007-ci ildəki hasilatdan 0,7 faiz çoxdur.
BP-nin məlumatına görə, Azərbaycanda təsdiqlənmiş qaz ehtiyatları 2009-cu ilin əvvəlində 1,2 trilyon kubmetr, İraqda 3,17 trilyon, Misirdə 2,17 trilyon kubmetr təşkil edib.
Ümumlikdə konsorsium tərəfindən Azərbaycan və İraqdan 16 milyard kubmetr həcmində qaz tədarükü gözlənilir ki, bu da layihənin birinci mərhələsinin həyata keçirilməsi üçün kifayət edəcək. Gələcəkdə boru kəmərinin gücünün 31 milyard kubmetrə kimi çatdırılması üçün Türkmənistan qazının da qoşulması planlaşdırılır.
Məqalə müəllifi ilə əlaqə ünvanı: [email protected]
