Bakı. Trend:
Siyasi risklərin sığortalanması və investisiya risklərinin azaldılması mexanizmləri regional inteqrasiya layihələrini investorlar üçün daha cəlbedici təşəbbüslərə çevirir və ölkələrin maliyyələşməyə çıxış imkanlarını genişləndirir.
Trend-in tədbirdəki müxbiri xəbər verir ki, bu barədə İslam İnkişaf Bankı Qrupunun Özəl Sektor üzrə 14-cü Forumunda çıxışı zamanı İslam İnvestisiya Sığortası və İxrac Kreditlərinin Sığortalanması Korporasiyasının (ICIEC) baş direktoru Xalid Xələfalla bildirib.
“Siyasi risklərin sığortalanması o demək deyil ki, ölkə mütləq yüksək riskli sayılır. Bəzən risk investorlarda yalnız informasiya fonu səbəbilə yaranan bir təsəvvürdür. Bizim sığorta təminatımız banklara kredit risklərinin əhəmiyyətli dərəcədə azalmasına imkan verir, bu da daha çox resursun səfərbər olunmasına və əlavə maliyyələşmənin cəlb edilməsinə kömək edir”, – deyə o bildirib.
Xələfalla qeyd edib ki, ICIEC İslam Əməkdaşlıq Təşkilatı (İƏT) ölkələrinin ixracını dəstəkləmək və birbaşa xarici investisiyaları cəlb etmək məqsədilə investorlara və maliyyə institutlarına siyasi risk sığortası təqdim etmək üçün yaradılıb.
Onun sözlərinə görə, fəaliyyətə başladığı gündən bu günə qədər korporasiya ümumilikdə 139 milyard ABŞ dolları həcmində ticarət və investisiya əməliyyatlarını sığortalayıb, bunun təxminən 57 milyard dolları İƏT ölkələri arasında ticarətə aiddir. “Bu, birbaşa regional inteqrasiyaya və üzv dövlətlər arasında ticarətin inkişafına töhfə verir”, – deyə o vurğulayıb.
ICIEC rəhbəri bildirib ki, təşkilatın fəaliyyətinin böyük hissəsi infrastruktur layihələrinin, xüsusilə nəqliyyat və enerji sektorlarının sığortalanmasına yönəlib. Onun sözlərinə görə, bu layihələr beynəlxalq maliyyə institutları və ixrac kredit agentlikləri ilə birgə həyata keçirilir.
O, nümunə kimi Ər-Riyad və Dubay metro layihələrində, eləcə də ötən il Türkiyədə həyata keçirilmiş üç dəmir yolu layihəsində ICIEC-in iştirakını qeyd edib. Bu layihələrdən biri Azərbaycan sərhədinə yaxın ərazidə yerləşir və Türkiyənin Gürcüstana ixracını artıraraq regional inteqrasiyanı gücləndirəcək.
“İnvestisiya sığortamızın əsas hissəsi infrastruktur layihələrinə — nəqliyyat və enerji sahələrinə yönəlib. Bu sahələr qonşu ölkələr arasında regional inteqrasiyanın və ticarətin inkişafı üçün əsas əhəmiyyət daşıyır”, – deyə Xələfalla əlavə edib.
