Bakı. Trend:
2026-cı ilin yanvar – sentyabr ayları ərzində İqtisadiyyat Nazirliyi yanında Dövlət Vergi Xidmətinin (DVX) xəttilə dövlət büdcəsinə 13 milyard 630,4 milyon manat vergi daxil olub ki, bu da proqnoza nisbətən 913,4 milyon manat çoxdur.
Bu barədə DVX məlumat yayıb.
Məlumata əsasən, 2025-ci ilin müvafiq dövrünə nisbətən vergi daxilolmaları 1 milyard 174,6 milyon manat və ya 9,4 faiz artıb.
Bildirilib ki, qeyri-neft-qaz sektorundan vergi daxilolmaları 10 milyard 332,6 milyon manat təşkil edib və büdcəyə proqnozdan əlavə 292,6 milyon manat vəsait ödənilib. 2025-ci ilin müvafiq dövrü ilə müqayisədə bu sektordan vergi daxilolmaları 1 milyard 159,3 milyon manat və ya 12,6 faiz artıb.
"2026-cı ilin yanvar – sentyabr aylarında məcburi dövlət sosial sığorta haqları üzrə daxilolmalar 5 milyard 59,7 milyon manat olub, proqnozdan əlavə 267,2 milyon manat vəsait ödənilib. Qeyri-büdcə təşkilatları üzrə daxilolmalar 3 milyard 401,6 milyon manatdan çox təşkil edib.
Həmin dövrdə işsizlikdən sığorta haqları üzrə daxilolmalar 179,9 milyon manatdan çox olub, proqnozdan əlavə 8 milyon manat vəsait ödənilib. Qeyri-büdcə təşkilatları üzrə daxilolmalar 139,5 milyon manata yaxın təşkil edib.
İcbari tibbi sığorta haqları üzrə daxilolmaların həcmi 758,8 milyon manata yaxın olub, proqnozdan əlavə 18 milyon manat vəsait ödənilib. Qeyri-büdcə təşkilatları üzrə daxilolmalar 507 milyon manata yaxın təşkil edib", - məlumatda qeyd edilib.
Vergi daxilolmalarında qeyri-neft-qaz sektorunun payının artması fonunda gələn il üzrə də yüksək göstəricilər proqnozlaşdırılır. Maliyyə Nazirliyinin açıqladığı “2027-ci il dövlət və icmal büdcələrinin ilkin göstəricilərinə dair Açıqlama” sənədində gələn il DVX-nin xətti ilə büdcəyə daxilolmalarla bağlı proqnozlar bunu təsdiqləyir.
Sənədə əsasən, 2027-ci ildə DVX-nin xətti ilə daxilolmaların 18 milyard 430 milyon manat olacağı gözlənilir. Bu məbləğin dövlət büdcəsi gəlirlərinin 47 faizini təşkil edəcəyi proqnozlaşdırılır.
2027-ci il üzrə göstəricinin 2026-cı ilin təsdiq olunmuş göstəricisindən 1 milyard 520 milyon manat və ya 9 faiz, 2025-ci ilin icra göstəricisindən isə 2 milyard 74,8 milyon manat və ya 12,7 faiz çox olacağı gözlənilir.
Gələn il DVX-nin xətti ilə daxilolmaların əsas hissəsinin qeyri-neft-qaz sektorunun hesabına formalaşacağı proqnozlaşdırılır. Belə ki, daxilolmaların 80,6 faizinin və ya 14 milyard 850 milyon manatının qeyri-neft-qaz sektorunun, 19,4 faizinin və ya 3 milyard 580 milyon manatının isə neft-qaz sektorunun payına düşəcəyi gözlənilir.
Beləliklə, 2026-cı ilin ilk doqquz ayında vergi daxilolmalarında qeyri-neft-qaz sektorunun artımı davam etdiyi halda, 2027-ci il üçün də büdcə daxilolmalarının əsas mənbəyi kimi bu sektor müəyyənləşdirilib.
