Bakı. Trend:
Yaponiyanın Okinava prefekturasında yerləşən ABŞ hərbçilərinə çərşənbə günü 48 saat ərzində spirtli içki qəbul etmək qadağan edilib və bir qadının qətlə yetirilməsi ilə bağlı ABŞ dəniz piyadasının şübhəli bilinməsindən sonra 30 gün müddətinə komendant saatı tətbiq olunacaq. Hadisə Yaponiyada hiddətə səbəb olub. Ölkədə ABŞ hərbçilərinin iştirakı ilə törədilən cinayətlər uzun müddətdir bu qoşunların ölkədə mövcudluğuna qarşı tənqidləri gücləndirir.
Okinava bölgəsinin koordinatoru və ABŞ Dəniz Piyadalarının III Ekspedisiya Qüvvələrinin komandanı Benjamin T. Watson çərşənbə günündən etibarən 48 saat müddətində “bazalarda və bazalardan kənarda spirtli içki qəbulunun tamamilə qadağan edildiyini” açıqlayıb. O bildirib ki, bu müddət ərzində bütün hərbi qulluqçular üçün “Okinava icmasının üzvləri kimi normalar, intizam və məsuliyyətlərimiz” mövzusunda təlimlər təşkil etmək mümkün olacaq.
Okinavadakı ən yüksək rütbəli ABŞ hərbi rəsmisi olan general-leytenant həmçinin cümə günündən başlayaraq 30 günlük “düşünmə dövrü” elan edib. Bu müddətdə gecə saat 00:00-dan səhər saat 05:00-dək komendant saatı tətbiq olunacaq.
Polis bazar günü Okinavada xidmət edən ABŞ dəniz piyadasının Naha şəhərində bir oteldə 39 yaşlı qadını öldürməkdə və onun pul kisəsini oğurlamaqda şübhəli bilinərək saxlanıldığını açıqlayıb. Yerli KİV-in məlumatına görə, qadın boğularaq öldürülüb. Dəniz piyadası ona qarşı irəli sürülən ittihamları rədd edir.
ABŞ-ın Yaponiyada, əsasən Okinavada, təxminən 54 min hərbi qulluqçusu yerləşdirilib. ABŞ hərbçiləri tərəfindən törədilən cinayətlər uzun müddətdir təhlükəsizlik sahəsində yaxın müttəfiq olan iki ölkə arasındakı münasibətlərdə gərginlik mənbəyi olaraq qalır.
Çərşənbə günü Yaponiya arxipelaqının ən cənubunda yerləşən Okinavanın qubernatoru Tokioda baş nazir Sanae Takaichiyə narahatlığını çatdırıb.
“Bu oğurluqla müşayiət olunan qətl sakinləri dərindən sarsıdıb və ABŞ bazalarının yaratdığı yükün azaldılması təcili zərurətdir”, - deyə Genta Koja bildirib. O, bununla bağlı hansı konkret addımları nəzərdə tutduğunu açıqlamayıb.
Bundan əvvəl o, müdafiə naziri Shinjiro Koizumi ilə görüşüb.
“Prefektura hökuməti dəfələrlə ABŞ ordusundan belə hadisələrin təkrarlanmaması üçün tədbirlər görməyi xahiş edib. Lakin belə bir hadisənin yenidən baş verməsi bizi bu qənaətə gətirir ki, ABŞ hərbi qüvvələrində intizam və insan hüquqları ilə bağlı maarifləndirmə tədbirləri ümumiyyətlə işləmir”, - deyə o, nazirə bildirib.
Koizumi isə belə hadisələrin təkrarlanmasının qarşısını almaq məqsədilə “effektiv tədbirlərin necə həyata keçiriləcəyinə dair ABŞ-la müzakirələri irəlilətmək” niyyətində olduğunu bildirib.
Ötən il Yaponiya məhkəməsi 20 yaşlarında olan bir qadını boğmaqda və ona təcavüz etməyə cəhd göstərməkdə ittiham olunan ABŞ dəniz piyadasını yeddi il müddətinə azadlıqdan məhrum edib.
2017-ci ildə hərbi bazada mülki işçi kimi çalışan keçmiş dəniz piyadası Okinava sakininə təcavüz etmək və onu öldürməkdə təqsirli bilinərək ömürlük həbs cəzasına məhkum edilib.
Həmin il Yaponiyadakı ABŞ hərbi qüvvələri bütün şəxsi heyətinə spirtli içki qəbul etməyi qadağan etmişdi. Buna səbəb sərxoş vəziyyətdə olan ABŞ dəniz piyadasının idarə etdiyi avtomobillə kiçik yük maşınına çırpılması və onun 61 yaşlı sürücüsünün, Okinava sakininin, həlak olması olmuşdu.
