Azərbaycan, Bakı, 18 fevral / Trend /
"Azərenerji" SC (Azərbaycanda elektrik enerjisi istehsalçısı və paylayıcısı) texniki-iqtisadi göstəricilərin səviyyəsini yüksəltmək, həmçinin elektrik enerjisi şəbəkələrinin stabil işləməsi məqsədi ilə bir sıra tədbirlər görmək niyyətindədir. Bu barədə SC-nin məlumatında deyilir.
Xüsusilə də 220 kilovoltluq Salyan yarımstansiyasının istismara verilməsi və 220 kilovoltluq Masallı yarımstansiyasının genişləndirilməsi nəzərdə tutulur.
Ötürücülük gücünün artırılması çərçivəsində uzunluğu təxminən 50 kilometr olan 220 kilovoltluq "Şirvan ES - Salyan BM" EÖX (elektrik ötürücü xətt), uzunluğu 107 km olan 220 kV-luq "Salyan BM-Masallı BM" EÖX, uzunluğu 82 km olan 330 kV-luq "Şirvan ES-İmişli BM" EÖX, uzunluğu 65 km olan 220 kV-luq "Masallı BM-Astara BM" (İran İslam Respublikası) EÖX-nın tikintisi, həmçinin 500 kV-luq Abşeron yarımstansiyasında 330 kV-luq dördüncü Şirvan EÖX-nın giriş-çıxışını təmin etmək məqsədilə uzunluğu 20 km olan 330 kV-luq elektrik ötürücü xəttinin çəkilməsi planlaşdırılır.
Bundan əlavə, yarımstansiyaların gücünün artırılması üçün məqsədyönlü tədbirlərin həyata keçirilməsi, xüsusilə də 220 kV-luq Xırdalan və İmişli yarımstansiyalarında, həmçinin 110 kV-luq Ağcabədi və Qala yarımstansiyalarındakı transformatorların daha güclüləri ilə əvəz edilməsi planlaşdırılıb.