Azərbaycan, Bakı, 10 avqust /Trend, müxbir E.İsmayılov/
İlin birinci yarısında Azərbaycanın dəniz yataqlar bloku "Azəri-Çıraq-Günəşli"dən neft hasilatı 62 quyuda aparılıb. Bu barədə layihənin operatoru qismində çıxış edən bp-nin hesabatında deyilir. Bu dövrdə, ümumilikdə, AÇG-də 20,2 milyon ton neft hasil edilib (150 milyon barel).
İlin birinci yarısı ərzində "Çıraq" yatağında istismarda 19 quyu (13 neft hasil edən və 6 subasan) olub və bu dövrdə yataqda sutkalıq hasilat 104,3 min barel təşkil edib.
"Mərkəzi Azəri" yatağında 18 quyu işləyib (13 neft hasil edən və 5 qazbasan). İlin birinci yarısında bu yataqda orta sutkalıq hasilat 202,5 min barel olub.
"Qərbi Azəri" yatağında istismarda 21 quyu olub (15 neft hasil edən və 6 subasan). Hesabat dövründə burada orta sutkalıq hasilat, təxminən, 256 min barel təşkil edib.
"Şərqi Azəri" yatağında 14 quyu istismar edilib (9 neft hasil edən və 5 subasan). Yanvar-iyun ərzində sutkalıq hasilat 138,4 min barel təşkil edib.
Dərin sularda yerləşən "Günəşli"də istismarda 22 quyu olub (12 neft hasil edən və 10 subasan) və ilin birinci yarısı ərzində sutkalıq hasilat 126,4 min barelə yaxın olub.
"Azəri-Çıraq-Günəşli" layihəsinin iştirakçıları aşağıdakılardır: bp (operator - 34,1367 faiz iştirak payı), "ChevronTexaco" (10,2814 faiz), ARDNŞ (10 faiz), INPEX (10 faiz), "Statoyl" (8,5633 faiz), "ExxonMobil" (8,006 faiz), TPAO (6,75 faiz), "Devon Energy" (5,6262 faiz), "Itochu" (3,9205 faiz), "Delta Hess" (2,7213 faiz).
