Azərbaycan, Bakı, 26 oktyabr /Trend/
ARDNŞ-nin (Azərbaycan Respublikası Dövlət Neft Şirkəti) "Azərikimya" İstehsalat Birliyi Səthi aktiv maddələr (SAM) zavodunda elektroliz istehsalatının fəaliyyətini bərpa edib. Bu barədə çərşənbə axşamı ARDNŞ-nin məlumatında bildirilir.
Məlumatda deyildiyi kimi, uzun fasilədən sonra elektroliz vannaları yenidən yüklənib, maye xlor və kaustik soda istehsalına başlanılıb. SAM zavodunun əsas istehsalat sahəsinin fəaliyyəti 2009-cu ilin dekabrından tamamilə dayandırılıb. "Azərikimya" ARDNŞ-nin tərkibinə daxil edildikdən sonra İstehsalat Birliyinin bütün zavodlarında olduğu kimi, bu müəssisənin əsas sahələrindən sayılan elektroliz istehsalatının fəaliyyətinin bərpası üçün də ciddi tədbirlər həyata keçirilib. İstehsalatın təmirə və yeniləşməyə xüsusi ehtiyacı olan kondensator şöbəsində kompressorların və kondensatorların keyfiyyətli təmiri, soyutma sexində aparılan yenidənqurma, təmir-bərpa işləri sona catıb. İstehsalatın yenidən işə salınması hər hansı bir problem və çətinlik doğurmadan uğurla həyata keçirilib. Bununla da müəssisədə maye xlor və kaustik soda ilə yanaşı, xlorid turşusunun alınması təmin edilib. Elektroliz istehsalatının işə salınması nəticəsində maye xlorun alınması Birliyin digər bir müəssisəsinin - "Üzvi sintez" zavodunun fəaliyyətinin bərpası üçün də mühüm əhəmiyyət kəsb edir. Belə ki, həmin zavodun xammalla təchizatı məsələsi də müsbət həllini tapıb.
Çərşənbə axşamı elektroliz vannalarının maksimum yüklənilməsi təmin edilib. Alınacaq kaustik soda və xlorid turşusunun ilk iri partiyalarının gün ərzində ARDNŞ-nin neftqazçıxarma idarələrinə və respublikanın digər müəssisələrinə göndərilməsi gözlənilir.