ARDNŞ Sinqapurun Petrofarm şirkəti ilə bağlanmış müqaviləyə uyğun olaraq iyulda 4 tankerlə 16,88 min ton avtomobil benzini ixrac etməyi planlaşdırır. ARDNŞ-dən Trend ə verilən məlumata görə, ümumi həcmi 12,66 min ton yanacaqdan ibarət 3 partiya artıq göndərilib. "Daha bir partiya bu gün yola salınacaq. Bu ay daha İrana benzin ixracı planlaşdırılmır", - deyə şirkətdən qeyd olunub.
İyulda Gürcüstana 12 min ton A-92 markalı benzin satılıb. Bu həcmin avqustda da saxlanılacağı gözlənilir. Həcmlərin azalması onunla izah edilir ki, hazırda Gürcüstan Bolqarıstandan fəal surətdə A-95 markalı benzin idxal edir. "Ancaq ARDNŞ istənilən halda Gürcüstana daha çox həcmdə benzin sata bilməzdi. Çünki hazırda neft ixracının artması hesabına NEZ-də emal azalıb", - deyə şirkətdən bildirilib.
İyunun sonunda ARDNŞ ikinci yarımildə 163 min ton A-92 markalı avtomobil benzininin satışı üzrə tenderi bağlı elan edib. Tenderin qalibi Gürcüstanın "Saknaftobtransi" dövlət şirkəti olub. Avtomobil benzini "Heydər Əliyev adına" NEZ-də (keçmiş "Azərneftyanacaq") istehsal olunur.
2005-ci ilin dekabrında ARDNŞ Sinqapurun Petrofarm şirkəti ilə 2006-cı ildə 50 min ton avtomobil benzininin tədarükünə dair müqavilə imzalayıb. Neft məhsulu Petrofarm-a FOB bazisi ilə Azneftyağın (ARDNŞ-in tərkibinə daxildir) balansına daxil olan N20 körpüsündən göndərilir. Petrofarm benzini XDGİ-yə məxsus tankerlərlə İranın Neka limanına çatdırır.
