Azərbaycanın Dövlət Neft Şirkəti Ceyhan limanından ilk şəxsi neft partiyasını yükləyib. Trend in xəbər verdiyi kimi, bu barədə ARDNŞ-dən xəbər veriblər. Bu partiya Tenerife Spirit tankerinə yüklənib. Onun həcmi 141,113.193 ton (1,049,293.49 barel) təşkil edib. ARDNŞ tərəfindən ona məxsus Azəri Light markalı neftin satışı üçün keçirilmiş tenderin qalibi Norveçin Statoil şirkəti olub.
Avqust ayında BTC Co boru kəməri şirkəti Türkiyənin Ceyhan limanından "Azəri-Çıraq-Günəşli"yatağında hasil edilən təxminən 1,18 mln. ton Azəri Light markalı neft yükləyəcək.
Bu ilin iyul ayında Bakı-Tbilisi-Ceyhan əsas ixrac boru kəməri ilə 787 min 011 ton neft (iyun ayında 422 min 889 ton neft) nəql edilib. Ötən ay Ceyhan limanından 811 min 835 ton həcmində neftlə 9 tanker göndərilib.
Neft ixracına başlandığı vaxtdan Bakı-Tbilisi-Ceyhan boru kəmərinə cəmi 1 mln. 999 min 103 ton neft vurulub. Avqustun 1-nə olan məlumata görə, Ceyhan limanından dünya bazarlarına 1 mln. 60 min 999 ton neft (12 tanker) göndərilib.