Azərkimya DK-nin tərkibinə daxil olan EP-300 zavodunda bu yaxınlarda yenidənqurulma işlərinin görüldüyü soba şöbəsində iş sabitləşdirilib. Trend EP-300 zavodunun direktor müavini Samir Manafova istinadən xəbər verir ki, həmçinin soyutma sistemi də xeyli yenilənib.
"Texnoloji prosesin bu hissəsindəki nöqsanlar hazır məhsul itkisinə səbəb olurdu. İndi bu cür hallar tamamilə istisna olunub", - deyə o vurğulayıb.
E-5 sexində də xeyli işlər görülüb. Burada polimerləşdirilmə prosesində boru kompressor və kolonnaların tıxanması səbəbindən çoxlu problemlər baş verirdi və onların təmizlənməsi çoxlu vəsait və səy tələb edirdi. "Bu problemi sxemə katalizatorun verilməsi yolu ilə həll edə bildik", - deyə o qeyd edib.
Onun sözlərinə görə, polietilen istehsalının fasiləsiz işləməsi yağ sisteminin yenidənqurulması sayəsində nizamlanıb.
Müəssisə mütəxəssislərinin MDB-də fəaliyyət göstərən zavodlara getməsi də müsbət nəticələr verib.
"Əməkdaşlarımızın Tomskun "Neftexim", Ufimskin "Ximprom", Novopoltskun "Polimer" müəssisəsinin təcrübəsini öyrənmələrinə əsasən tədbirlər planı tərtib olunub. Bu plana əsasən ilin sonunadək politetilen istehsalı üçün daha bir soba şöbəsinin yenidənqurulması və E-5 sexində avadanlığın polimerləşdirilməsi səviyyəsini minimuma endirmək planlaşdırılıb", - deyə direktor müavini bildirib.
Hazırda zavodda boru kompressorlarının işinin və E-4 sexində bütün texnoloji prosesin tam avtomatlaşdırılması üzrə işlər görülür. Bunun üçün Amerikanın CCC şirkətindən avadanlıq alınıb. Avstriyanın NALKO şirkətinin köməyi ilə soyuducu qurğunun yenidənqurulması nəzərdə tutulub.
