Bugünkü qiymətləndirmələrə görə Azərbaycanın neft ehtiyatları 30 mlrd. barel, qaz ehtiyatları - 5 trln. m3 təşkil edir. Bu barədə bu gün Bakıda keçirilən "Xəzərin nefti, qazı, yataqları - 2006" konfransında AZBTC CO -nun icraçı direktoru İlham Nəsirov bildirib.
Onun sözlərinə görə, Xəzər bölgəsində (İranı nəzərə almadan) neft ehtiyatları 210 mlrd. barel həcmində qiymətləndirilir. "Bu həcm 8 il ərzində dünyanın neftə olan tələbatını təmin edə bilər", - deyə o bildirib. 2010-cu ildə dünyada istehlak olunan neftin sutkalıq həcmi 87 mln. barel, 2030-cu ilə qədər isə 117 mln. barelə qədər artacaq.
"Bakı-Tbilisi-Ceyhan (BTC) neft kəmərinin tikintisi Qara dənizi və Türkiyə boğazlarını ildə 350 tankerdən azad etməyə imkan verdi", - deyə o bildirib.
O qeyd edib ki, bütün Azərbaycan neftinin lazım olan həcmini nəql etmək üçün BTC boru kəməri sutkada 1,2 mln. barelə qədər genişləndiriləcək. "Qazaxıstanın "Kaşagan" yatağındakı nefti nəzərə almaqla, həcmin 2008-12-ci illərdə 1,5 mln. barelə qədər artırılması nəzərdə tutulub. Boru kəmərinin daşıma qabiliyyəti Orta Asiya istehsalçılarının neftinin cəlb olunmasını nəzərə almaqla, 2 mln. barelə qədər artırıla bilər", - deyə İ.Nəsirov bildirib.
Hazırda Qazaxıstan və Azərbaycanda Aktau-Bakı sisteminin müasirləşdirilməsi üzrə işlər görülür. "Ehtimal olunur ki, 2010-cu ilin ortalarına qədər bu marşrut üzrə təxminən 500 min barel neft nəql olunacaq, gələcəkdə isə bu rəqəm sutkada 750 barelə qədər artacaq", - deyə o bildirib.
