Bakı. Trend:
COP29 çərçivəsində "Fəaliyyətdə birlik: Karib bölgəsinin ədalətli və dayanıqlı adaları üçün müxtəlif nəsillərin səsləri" mövzusunda panel müzakirə keçirilib.
Trend xəbər verir ki, tədbirdə çıxış edən ekoloq və jurnalist Tyrell Gittens qeyd edib ki, ənənəvi biliklər daha davamlı dünya üçün vacibdir.
"Karib hövzəsində biz iqlim dəyişikliyi ilə bağlı bir neçə böhranla üzləşirik. Təbii ki, icmalar daşqınlar, quraqlıqlar və s. kimi ekstremal hava hadisələrindən təsirləndikdə iqlimə davamlılığı artırmaq üçün bir sıra fəaliyyətlərimiz var. İnanıram ki, ənənəvi biliklər cəmiyyət olaraq iqlim dəyişikliyinə qarşı daha davamlı olmaq üçün necə irəliləyəcəyimiz üçün əsas kimi çox vacibdir", - o bildirib.
Onun sözlərinə görə, davamlılıq konsepsiyaları cəmiyyət üçün yeni bir şey kimi qəbul edilə bilər, amma əslində onlar uzun müddətdir ki, mövcuddur.
Şərqi Karib hövzəsi xalqlarının hüquq müdafiəçisi Uitni Melinard isə qeyd edib ki, iqlim dəyişiklikləri Şərqi Karib hövzəsi xalqlarının iqtisadi və mədəni dayanıqlığına ciddi təsir göstərib.
"Biz Şərqi Karib hövzəsində qalan son yerli xalqlarıq və inanırıq ki, iqlim dəyişikliyindən irəli gələn çətinliklərin öhdəsindən gəlmək üçün dözümlülüyümüz və yaradıcılığımız var. Bununla belə, təəssüf doğuran haldır ki, səbət hörmə və qayıq hazırlamaq kimi resurslarımızı, biliklərimizi və ənənələrimizi itirməkdə davam edirik, xüsusilə iqlimlə bağlı fırtınalar səbəbindən", - o bildirib.
Uitni Melinard vurğulayıb ki, bu itkilər icmalara təkcə ənənə baxımından deyil, həm də iqtisadi dayanıqlıq baxımından təsir edib, çünki icmada qadınlar səbət hörmə kimi ənənəvi sənətlə məşğuldurlar və bu sənətlərdən asılıdırlar.
"O cümlədən biz daha çox daşqınlar, torpaq eroziyası və bunun nəticəsində insanların köç etməsi ilə üzləşirik. Lakin birlikdə hərəkət etməyin vacibliyini dərk etmək üçün düşünürəm ki, ənənəvi bilikləri gənclərin enerjisi ilə birləşdirmək güclü və təsirli bir sinerji yarada bilər", - deyə o əlavə edib.
