Azərbaycan, Bakı, 07 mart / Trend , müxbir S.Babayeva /
"Azerpocht (poçt xidmətləri) dövlət müəssisəsində "Maliyyə xidmətlərinin inkişafı" layihəsi çərçivəsində korporativ informasiya şəbəkəsinin tətbiqi oktyabra qədər baş çatdırılacaq", - Azərbaycan Rabitə və İnformasiya Texnologiyaları Nazirliyinin poçt sektorunun rəhbəri Novruz Məmmədov deyib.
"Sistem müxtəlif modullardan ibarətdir və artıq birinci modul (avtomatik mühasibat uçotunun hazırlanması) çərçivəsində Bakının 100-dən çox şöbəsi sistemə qoşulub", - Məmmədov bildirib.
Onun sözlərinə görə, ikinci modul - pul köçürmələri üzrə işlər artıq baş çatdırılır və poçt xidmətləri üzrə üçüncü modul tətbiq olunmaqdadır.
Sistemin tətbiqindən sonra Azerpocht DM paytaxtda, daha sonra regionlarda bank maliyyə xidmətləri götərməyə başlayacaq.
Poçt maliyyə və avtomat əməliyyat sisteminin hazırlayıcıları HP, Colvir və Sinam konsorsiumudur.
Sistem həm də ödəmə, depozit, xəzinədarlıq, aktiv və passivlərin, likvidliyin idarə edilməsi, idarəetmənin informasiya sistemi və poçt, həmçinin beynəlxalq poçt göndərişlərinin izlənilməsi və poçt xidmətlərinin avtomatlaşdırılması kimi maliyyə modullarını da özündə ehtiva edir.
Əsas komponenti ölkənin poçt sisteminin təkmilləşdirilməsi olan "Maliyyə xidmətlərinin inkişafı" layihəsinin dəyəri 17,5 milyon dollardır. Dünya Bankı bu layihə üçün 12,25 milyon dollarlıq kredit ayırır, digər hissənin ödənməsi isə Azərbaycan hökumətinin payına düşür. Layihənin məqsədi maliyyə xidmətlərinin həyata keçirilməsi üçün poçt şəbəkəsinin təkmilləşdirilməsidir.
Məqalə müəllifi ilə əlaqə ünvanı: [email protected]