Azərbaycan, Bakı, 19 avqust /Trend, müxbir H.Vəliyev/
"Epson" şirkəti Azərbaycan bazarına 3LCD texnologiyaları əsasında yeni proyektorlar təqdim edib. Bu barədə AZEL şirkətinin məlumatında deyilir.
3LCD dünyada detalların parlaq və təbii rəngdə, dəqiq əks olunmasını təmin edən aparıcı proyeksiya texnologiyalarıdır. Texnologiya bütün dünyada proyektorların və düzekranlı televizorların aparıcı istehsalçılarının istifadə etdikləri maye-kristal texnologiyalara əsaslanır.
Biznes və ev istifadəçiləri üçün nəzərdə tutulmuş yeni şəbəkə "Epson"un Azərbaycandakı distribüteri olan Azərbaycanın İT şirkəti AZEL şirkətinin dəstəyi ilə avqustun 26-da keçiriləcək seminar çərçivəsində təqdim olunacaq.
Tədbirin gedişində "Epson" təmsilçiləri şirkətin bazarın müxtəlif seqmentləri üçün təqdim etdiyi əsas məhsul və həlləri təqdim edəcək. Şirkət biznes proyektorları və ev kinoteatrları üçün proyektorları, printerləri, çoxfunksiyalı mexanizmləri təqdim edəcək.
Rəngli lazer printerlərinə və çoxfunksiyalı mexanizmlərə də xüsusi diqqət ayrılacaq.
Şirkət çap texnikasından ibarət məhsulları sırasında fotoprinterlər, ev fotostudiyaları, ev və ofis üçün dördrəngli printerlər, eləcə də onlar üçün materiallar təqdim edəcək.
"Epson"un peşəkarlar və həvəskarlar üçün nəzərdə tutulmuş ofis texnikası arasında ev skaynerlərinin, InkJet ofis texnikasının və lazer printerlərinin yeni modelləri də təqdim olunacaq.
