Azərbaycan, Bakı, 11 dekabr/Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi naviqasiya sistemlərindən istifadə imkanlarının tədqiqinə başlayıb. Bu barədə şənbə günü Trend-ə nazirliyin telekommunikasiya şöbəsinin müşaviri Qulam Abdullayev deyib.
Abdullayevin sözlərinə görə, peyk rabitəsi əsasında xidmətlərin təşkili Azərbaycanda həyata keçirilən "2010-2012-ci illər üçün Azərbaycanda rabitə və informasiya texnologiyalarının inkişafı üzrə Dövlət Proqramı" (Elektron Azərbaycan) çərçivəsində məqsədlərdən biridir.
"Biz bu gün kosmik sənaye sahəsində çoxlu ölkələrlə əməkdaşlıq edirik və ölkələrin siyahısı gələcəkdə də artacaq. Naviqasiya xidmətləri üçün tərəfimizdən hansı platformanın istifadə ediləcəyinə gəldikdə, yəni bunun məhz Avropanın "Galileo", ABŞ-ın "GPS" və ya Rusiyanın "QLONASS" sistemləri olacağı haqda danışmaq hələ ki çətindir, çünki bu istiqamətdə müəyyən tədqiqatlar aparılmayıb. Bununla belə, tərəfimizdən bu və ya digər sistemin seçilməsi bilavasitə ölkənin tələbatlarından və sistemlərin üstünlüklərindən asılı olacaq. Bu istiqamətdə işlər artıq aparılır", - Abdullayev qeyd edib.
Onun sözlərinə görə, 2012-ci ildə orbitə çıxarılacaq Azərbaycanın telekommunikasiya peyki "Azerspace" bilavasitə naviqasiya xidmətlərinin göstərilməsinə hesalanmasa da, ölkəni naviqasiya üçün müəyyən funksiyalar yığımı ilə təmin edə bilər.
Bu gün naviqasiya sistemlərindən istifadəni Azərbaycan Nəqliyyat Nazirliyi də nəzərdən keçirir. Söhbət Azərbaycanda nəqliyyatın hərəkətində peyk monitorinqi sisteminin tətbiqindən gedir. Bu istiqamətdə işlər peyk naviqasiyasından istifadə etməklə, nəqliyyatın idarə edilməsinin intellektual sisteminin yaradılması layihəsi çərçivəsində aparılır. Bakıda sərnişin nəqliyyatının tənzimlənməsi və idarə edilməsi məqsədilə yaradılan sistem artıq gələn ilin fevralında fəaliyyətə başlamalıdır.
