Azərbaycan, Bakı, 8 yanvar /Trend, müxbir H.Vəliyev/
"Əqli mülkiyyət hüququnun təminatı və piratlıqla mübarizə haqqında" qanun layihəsinə Azərbaycan Milli Məclisində baxılır. Bu barədə Azərbaycan Müəllif Hüquqları Agentliyinin 2010-cu ilin yekunları üzrə hesabatında deyilir.
Bu hüquqi sənəd əqli mülkiyyət sahiblərinin hüquqlarının müdafiəsi məsələlərini tənzimləməli və onların marağı və hüquqpozmaların qarşısının alınması ilə bağlı inzibati və məhkəmə prosedurlarını müəyyən etməlidir.
Qanun layihəsinin üçüncü fəsli tamamilə piratlıqla mübarizəyə aiddir. Orada ifaların, fonoqramların rəqəmsal kodlaşdırılması və əqli mülkiyyətin digər obyektləri ilə bağlı olan konkret normalar göstərilib. Qanun informasiya texnologiyalarından qanunsuz istifadənin qarşısının alınmasına yönəlib ki, bu da əqli mülkiyyətin elektron ticarət sisteminə güclənməkdə olan inteqrasiyası və digər faktorlarla əlaqədar qaçılmazdır.
Agentlik tərəfindən Azərbaycanın müəllif hüquqlarının Ümumdünya Ticarət Təşkilatı və Avropa İttifaqının normalarına uyğunlaşdırılması üzrə qanunvericiliyin harmonizasiyası ilə bağlı tədbirlər planı təsdiq edilib.
Dünya təcrübəsini nəzərə alan agentlik tərəfindən əqli mülkiyyət hüququ və "Elektron ticarət haqqında" qanuna dəyişikliklər edilməsi ilə bağlı yeni təkliflər irəli sürülüb. Azərbaycan Nazirlər Kabinetinin əqli mülkiyyət hüququ obyektləri tərəfindən "elektron ticarət"in aparılması üzrə fəaliyyətin tənzimlənməsi haqqında qərar layihəsi də hazırlanıb.
Nazirlər Kabinetinə İnzibati, Cinayət və Cinayət-Prosessual məcəllələrdə müvafiq hüquqpozmalarla bağlı sanksiyaların sərtləşdirilməsi üzrə təkliflər təqdim edilib.
Agentlik tərəfindən "Solou" iqtisadi-riyaziyyat modeli əsasında hesablanıb ki, 2004-cü ildə Azərbaycan iqtisadiyyatının artım tempi biliyin 7,2 faiz sayəsində təmin olunurdusa, 2010-cu ilin sonuna bu göstərici 20,6 faizə çatıb.
Agentliyin araşdırmasına görə, müəllif hüququna əsaslanan sənayenin 2010-cu ildə Azərbaycan ÜDM-inə töhfəsi 3,4 faiz təşkil edib, halbuki həmin göstərici 2004-cü ildə 2,4 faiz olub.
Ötən ilin yekunları üzrə Müəllif Hüquqları Agentliyi tərəfindən bu sahədə piratlıq əleyhinə proqram yenilənib və onun həyata keçirilməsi ilə bağlı tədbirlər gücləndirilib.
Agentliyin dövlət orqanları ilə birgə həyata keçirdiyi fəaliyyət sayəsində Azərbaycanda proqram təminatı sahəsində piratlığın səviyyəsi 96 faizdən 88 faizə enib.
Ötən ilin yekunları üzrə yoxlamalar nəticəsində 10 min ədədə yaxın piratlıq məhsulu və müxtəlif daşıyıcılar (CD, DVD və b.) müsadirə olunub.
Hökumət tərəfindən piratlıqla mübarizə və müəllif hüquqlarının müdafiəsi üzrə komissiyanın yaradılması təşəbbüsü bəyənilib. O, bundan sonra piratlıqla mübarizə fəaliyyətini mərkəzi və yerli icra hakimiyyəti orqanları, bələdiyyələr və təşkilati hüquqi formasından asılı olmayaraq, bütün hüquqi şəxslərlə birgə əlaqələndirəcək.
