Azərbaycanda elmi tədqiqatlar dövlət büdcəsindən maliyyələşdiriləcək - AMEA
Azərbaycan, Bakı, 11 avqust /Trend, müxbir H.Vəliyev/
Fundamental elmi tədqiqatlar Azərbaycanın dövlət büdcəsi hesabına maliyyələşdiriləcək. Bu barədə Azərbaycan Milli Elmlər Akademiyasının İnformasiya Texnologiyaları İnstitutunun məlumatında deyilir.
Hazırda fundamental tədqiqatların maya dəyəri və gəliri həm Azərbaycanda, həm də dünyanın əksər ölkələrində real deyil. Hətta inkişaf etmiş ölkələrdə bu məsələ müzakirə predmeti deyil və bu tədqiqatlar əksər hallarda öz investorlarını tapmır, bu isə risklərin yüksək səviyyəsi ilə əlaqədardır.
Buna görə dövlət onları bilavasitə dövlət büdcəsindən ödəyərək bu funksiyaları öz üzərinə götürür.
Bundan əvvəl Azərbaycan Milli Elmlər Akademiyasının İnformasiya Texnologiyaları İnstitutunun direktoru Rasim Əliquliyevin dediyinə görə, Azərbaycan elminin inkişafı və elmi ideyaların həyata keçirilməsi üçün vençur kapitaldan istifadə tələb olunur.
Onun sözlərinə görə, iqtisadiyyatın digər sahələrinə qoyulan investisiyalardan fərqli olaraq, elmi layihələrə qoyulan investisiyalar köklü şəkildə fərqlənir.
2011-ci il üçün ölkə büdcəsində elmin inkişafına ayrılan vəsaitlərin xüsusi çəkisi 0,9 faiz təşkil edəcək. Bu il Azərbaycanın elmi potensialının maliyyələşdirilməsinin həcmi 108,6 milyon manat təşkil edəcək. Bu, 2010-cu ildə ayrılan vəsaitlərdən 5,8 milyon manat və ya 5,6 faiz çoxdur.
Vəsaitlər fundamental elmi tədqiqatlara və dövlət orqanları yanında fəaliyyət göstərən təşkilatların işinin maliyyələşdirilməsinə yönəldiləcək.
