Azərbaycan, Bakı, 2 may /Trend, müxbir H.Vəliyev/
2014-cü ilin aprel ayının nəticələrinə görə, Azərbaycanın mobil qurğular bazarında Finlandiyanın "Nokia" şirkətinin payı 13,33 faiz azalıb. Trend-in məlumatına görə, bu barədə "Global Stats" Statistika Mərkəzinin yaydığı hesabatda deyilir.
2014-cü il mayın 1-nə olan vəziyyətə görə, bu şirkətin telefonlarının Azərbaycan bazarında payı 21,2 faizdir. Şirkət Azərbaycanın mobil telefonlar bazarında ikinci yeri tutur. 2014-cü ilin yanvar-aprel aylarında "Nokia"nın payı 24,29 faiz azalıb. 2013-cü ilin analoji dövrü ilə müqayisədə azalma 44,38 faiz təşkil edib.
"Global Stats"ın məlumatına görə, hesabat dövrü ərzində Azərbaycanın mobil qurğular bazarında Koreyanın "Samsung" şirkətinin payı 5,17 faiz artıb. "Samsung" Azərbaycanda mobil qurğuların populyarlığına görə birinci yeri tutur və onun bazar payı 43,3 faizdir. 2014-cü ilin ilk 4 ayının nəticəsinə əsasən, "Samsung"un ölkə bazarında payının artımı 12,87 faiz olub. 2013-cü ilin eyni dövrü ilə müqayisədə şirkətin payının artımı 52,25 faiz təşkil edib.
Hesabat dövründə Azərbaycan bazarında "Apple" şirkətinin mobil qurğularının payı 3,6 faiz artıb. "Apple" 14,38 faizlə Azərbaycanın mobil telefonlar bazarında üçüncü yeri tutur. İlin əvvəlinə olan göstərici ilə müqayisədə "Apple"in payının artımı 4,27 faiz olub.
Naməlum istehsalçıların mobil qurğuları (əsasən Çin məhsulları) 6,28 faiz payla dördüncü yerdədir. Daha sonra mobil qurğular bazarında "Sony" - 5,36 faiz, "Huawei" - 3,27 faiz, HTC - 2,65 faiz, "Blackberry" - 1,87 faiz, LG - 0,95 faiz və Google 0,23 faiz paya sahibdir.
