Azərbaycan, Bakı, 19 noyabr /Trend, müxbir Hüseyn Vəliyev/
Azərbaycanda radiosiqnalların mənbələrinin xüsusiyyətlərini eyniləşdirmək üçün alqoritmlər və proqram platforması hazırlanır. Bu barədə çərşənbə günü Trend-ə layihənin rəhbəri Qəzənfər Orucov bildirib.
Layihə Azərbaycanın Rabitə və Yüksək Texnologiyalar Nazirliyinin İnformasiya Texnologiyalarının İnkişafı Dövlət Fondunun maliyyə dəstəyi hesabına reallaşır. Layihənin reallaşdırılmasına Dövlət Fondu tərəfindən 20 min manat vəsait ayrılıb.
Q.Orucovun sözlərinə görə, layihə TV və radio efir siqnallarının mənbələrini dəqiq müəyyən etməyə imkan verən sistemin yaradılmasını nəzərdə tutur: "Bu istiqamətdə aparılan işlər 3 mərhələyə bölünüb. Birinci mərhələ məntəqələrin birində mənbənin eyniləşdirilməsi üzrə işlərin görülməsini nəzərdə tutur. Daha sonra işlər bütün məntəqələri, sonda isə ölkədə fəaliyyətdə olan bütün şəbəkə infrastrukturunu əhatə edəcək".
O, qeyd edib ki, layihə üzrə işlərin 2015-ci ilin ortalarında tamamlanması planlaşdırılır: "Başlıca vəzifə yayımlanan siqnalın mənbəyinin aşkar edilməsidir. Bu məsələ müəyyən səviyyələrdə həll edilir, lakin bu qədər səmərəli yox. Praktikada söhbət efir siqnallarının onlayn rejimdə stansiyaların dəqiq yerini müəyyən etmək məqsədilə qəbulundan və emalından gedir ki, bu da ölkənin efir məkanı üzərində nəzarəti asanlaşdırır. Sistem avtomatik olaraq stansiyanın yerini dəyişməsi faktını aşkar edə bilər və bu da ölkənin efir məkanına müdaxilənin qarşısını vaxtında ala bilər".
