Amerika -Azərbaycan ticarət palatası missiyası (USACC) - informasiya-kommunikasiya texnologiyaları sahəsində ixtisaslaşmış lider Amerika şirkətlərinin rəhbərləri Bakıya səfər edəcək. Missiyaya palatanın həmsədri Ceyms Beyker başçılıq edəcək. Bu barədə Trend USACC-in məlumatına istinadən xəbər verib.
Səfər oktyabrın 1-4-də baş tutacaq. Səfər zamanı missiya iki nazir - rabitə və informasiya texnologiyaları naziri Əli Abbasov və iqtisadi inkişaf naziri Heydər Babayev də daxil olmaqla, Azərbaycan hökümətinin yüksək vəzifəli nümayəndələri ilə görüş keçirəcək.
Palatada hesab edirlər ki, missiya Azərbaycanın sürətlə inkişaf edən İT bazarını öyrənmək, potensial tərəfdaşları ilə görüşmək, öz bizneslərinin Azərbaycanda və Xəzər bölgəsində genişləndirilmə yollarını tapmaq üçün Amerika şirkətlərinə ideal imkan yaradacaq.
Palata həmçinin eksklüziv Amerika-Azərbaycan biznes -forumunun keçirilməsini də maliyyələşdirəcək. Forum oktyabrın 3-6-da Bakıda BakuTel 2006 sərgisi çərçivəsində keçiriləcək.
USACC 1995-ci ildə ABŞ və Azərbaycan arasında biznesin təşkili üçün yaradılıb.
