Dünya iqtisadiyyatı üzrə Davos forumu 115 ölkənin informasiya və kommunikasiya texnologiyaları sahəsində mənfəət əldə etməsinə hazırlıq vəziyyətini əks etdirən hesabat hazırlayıb. Trend in Azərbaycanın Rabitə və İnformasiya Texnologiyaları Nazirliyinin mətbuat xidmətinə istinadən xəbər verdiyi kimi, 2005-2006-cı illəri əhatə edən hesabatda Azərbaycan 73-cü, MDB ölkələri arasında isə Qazaxıstan (60) və Rusiyadan (72) sonra 3-cü yeri tutur. Reytinqdə Azərbaycan Ukrayna (76), Ermənistan (86), Moldaviya (94) və Gürcüstanı (96) qabaqlayıb.
Reytinqə birinci yeri ABŞ, ikinci yeri Sinqapur, üçüncü yeri Danimarka tutur. Forumun 2004-cü il hesabatında Azərbaycan dünyanın 104 ölkəsi arasında heç bir mövqe tutmamışdı.
Davos forumu (Davos summit) kimi də tanınan Dünya İqtisadi Forumu (World Economic Forum, WEF) Cenevrədə qərargah mənzili olan iri beynəlxalq qeyri-hökumət təşkilatıdır. WEF-in illik forumu ənənəvi olaraq elə qeyri-rəsmi adını götürdüyü İsveçrənin Davos şəhərində keçirilir. Bundan başqa, WEF hər il müxtəlif ölkələrdə regional və milli sammitlər keçirir. WEF-in əsas məqsədi iqtisadi inkişaf və sosial tərəqqi məsələlərinin həllində dünya ictimaiyyətinə yardım etməklə qlobal vəziyyəti yaxşılaşdırmaqdan ibarətdir. Bu məqsədlə forum qlobal inkişafla bağlı əsas problemlərin müzakirəsi və həlli üçün dünya ictimaiyyətinin işgüzar, siyasi, intellektual və digər liderləri arasında tərəfdaşlığın inkişafına kömək edir.
