Bu gün Azərbaycan Rabitə və İnformasiya Texnologiyaları Nazirliyində İran tele-radio yayım şirkəti nümayəndə heyəti ilə görüş keçirilib. Bu barədə Trend ə nazirlikdən bildiriblər.
İran şirkəti sədri İzətulla Zarqaminin başçılığı altında nümayəndə heyətinin səfəri bu gün Azərbaycan rabitə və informasiya texnologiyaları naziri Əli Abbasovun dəvəti ilə başlayıb.
İdarədən bildiriblər: "Görüş zamanı tərəflər arasında əməkdaşlıq məsələləri, İranla sərhəd regionlarda kanalların paylanması məsələsinin həll edilməsi, efir məkanın qorunması və digər texniki məsələlər müzakirə edilib".
İlkin danışıqlar zamanı tərəflər müzakirə edilən məsələlər üzrə qarşılıqlı iş aparmaq barədə razılığa gəliblər.
Bu gün həmçinin ekspetrlər səviyyəsində görüş keçiriləcək.
İranın tele-radio şirkəti təxminən 40 tele-radio kanalı cəmləşdirir. Bu sahədə bir neçə min adam işləyir. Tele-radio yayım şirkətinin rəhbərini İranın ali lideri təiyn edir.
Görüş zamanı bir sıra sənədlərin imzalanması da istisna edilmir.
İran komitəsi rəhbərinin Azərbaycana səfərinin əsas məqsədi - ikitərəfli münasibətlərin möhkəmləndirilməsi, bir sıra texniki məsələlərin, o cümlədən informasiya texnologiyalarının istehsalı sahəsində əməkdaşlığın müzakirəsidir.