2007-ci ilin ilk ayında Azərbaycanın Rabitə və İnformasiya Texnologiyaları Nazirliyi 1536 telefon nömrəsi istifadəyə verib. Bu barədə bu gün Trend ə nazirlikdən məlumat verilib.
İstifadəyə verilmiş ümumi nömrələrdən 1024-ü Bakı Telefon Rabitəsi İB-nin, qalanı isə Aztelekom İB-nin payına düşüb. 2006-cı ildə istifadəyə verilmiş nömrələrin ümumi sayı 280594 nömrə təşkil edib. Bu göstərici 2005-ci ildəki göstəricidən 116409 nömrə çoxdur.
Aztelekom İB bütün Bakı və Naxçıvan MR-ni əhatə etməklə respublikanın bütün ərazisini şəhərlərarası və beynəlxalq telefon rabitəsi ilə təmin edir. Beynəlxalq rabitədə vahid operator olmaqla, təbii inhisarçıdır. Onun nəzdində 54 telekommunikasiya müəssisəsi, Bakı Beynəlxalq Telefon Qovşağı, Kabel Magistral Texniki Qovşaq və Təmir-Tikinti İdarəsi var.
BTRİB Bakıda dövlət müəssisələri və idarələrinə, müəssisələrə və təşkilatlara, həmçinin xarici hüquqi şəxslərə telefon və radio əlaqənin bütün xidmətlərini göstərir. O, özündə 9 telekommunikasiya müəssisəsini, rabitənin quraşdırılmasının təmir və tikinti idarəsi və Azərrabitəlayihə layihə-kəşfiyyat kontorunu birləşdirir.