Azərbaycan, Bakı /müx. Trend S.Babayeva/ Yaxın iki ildə Azərbaycanın telekommunikasiya sahəsinə hökumət tərəfindən 250-300 mln. dollar yatırılacaq.
Bu barədə birinci Azərbaycan-İsrail İT forumu zamanı Azərbaycanın rabitə və informasiya texnologiyaları naziri Əli Abbasov məlumat verib.
Nazirin sözlərinə görə, Azərbaycanda bəzi İT göstəriciləri dünyadakı göstəricilərdən geri qalır. Belə ki, 100 nəfərə 5-6 kompüter, 15 stasionar telefon və 42-45 mobil telefonu düşür. Genişzolaqlı rabitəyə çıxış azdır. İnternet istifadəçilərin sayı isə əhalinin 10 faizini təşkil edir.
"Lakin bütün bunlar Azərbaycanda işləmək istəyən xarici şirkətlərin marağına mənfi təsir göstərməməlidir. Çünki onların fəaliyyəti üçün ölkədə şərait var. Əsas isə sahənin inkişaf potensialıdır" - deyə nazir qeyd edib.
İsrail şirkətləri ilə əməkdaşlıq məsələlərinə gəldikdə isə Abbasov bildirib ki, Azərbaycan bazarında Wi -Max və genişzolaqlı rabitə xidmətlərinə, eləcə də telesəhiyyə, NGN (Next Generation Network) şəbəkələrinin yaradılmasına tələbat var. Eyni zamanda Azərbaycanda elektron hökumətin genişləndirilməsi ilə bağlı layihələrin inkişafı vacibdir.