Bakı. Trend:
Dünyaya bütün sahələrdə tam müstəqil Türkiyə mesajını vermək istəyirik.
Trend-in TurkicWorld-ə istinadən məlumatına görə, bu barədə Türkiyənin sənaye və texnologiya naziri Mehmet Fatih Kacır bildirib.
"Gənclərimiz TEKNOFEST kimi yarışmalarda texnologiya sahəsində dünya ilə rəqabət aparacaqlarına inam qazanırlar. 2018-ci ildə 14 texnologiya yarışması təşkil etdik və 20 min gənc burada iştirak etdi. Bu, həmin il üçün böyük uğur idi. Bu il TEKNOFEST-də keçirilən 44 texnologiya yarışmasında 330 mindən çox komanda və 1 milyondan çox gənc iştirak edib", - deyə o vurğulayıb.
Nazir bildirib ki, Türkiyənin Ədalət və İnkişaf Partiyasının (AK Parti) iqtidara gəldiyi il 414 patent müraciəti olmuşdu, bu rəqəm 20 ildə 9 mini keçib.
"Yaxın aylarda astronavtlarımız beynəlxalq kosmik stansiyaya gedərək Türk Kosmos Elmi missiyasını yerinə yetirəcəklər. Türkiyənin milli kosmik proqramını mərhələ-mərhələ həyata keçiririk. Biz milli miqyasda orijinal texnologiyaların reallaşdırılması istiqamətində addımlar atırıq", - deyə o qeyd edib.
Qeyd edək ki, Türkiyə Cümhuriyyətinin yaranmasının 100-cü ildönümü münasibətilə bu gün paytaxt Ankarada TEKNOFEST keçiriləcək.