Bakı. Trend:
ABŞ-yə məxsus “MQ-4C Triton” kəşfiyyat təyinatlı pilotsuz uçan aparatlar (PUA) qeyri-müəyyən müddətə Birləşmiş Ştatların Yaponiyanın Okinava adasındakı hərbi hava bazasına yerləşdiriləcək.
Trend ölkənin yerli KİV-lərinə istinadən xəbər verir ki, bu barədə Yaponiyanın Müdafiə Nazirliyi məlumat yayıb.
Məlumata görə, bunda məqsəd Şərqi-Çin dənizinin Yaponiyaya aid akvatoriyasında məlumat toplanması imkanlarını genişləndirməkdir.
"MQ-4C Triton" – ABŞ Hərbi Dəniz Qüvvələri üçün Northrop Grumman tərəfindən hazırlanmış yüksək hündürlükdə və uzun müddətli uçuş qabiliyyətinə malik pilotsuz uçuş aparatıdır. RQ-4 Global Hawk platforması əsasında yaradılan Triton geniş okean ərazilərində dəniz müşahidəsi və kəşfiyyat missiyaları üçün nəzərdə tutulub.
Təxminən 15 metr uzunluqda olan “MQ-4C Triton” kəşfiyyat dronu 24 saat ərzində 18 min metrdən artıq yüksəklikdən kəşfiyyat məlumat toplaya bilir. Onun möhkəm konstruksiyası buzlaşmaya qarşı sistemləri və gücləndirilmiş qanadları ilə sərt hava şəraitinə dözməsini təmin edir.