Bakı. Trend:
Yaponiyanın elektronika nəhəngi Panasonic bu maliyyə ilində əməkdaşlarının təxminən 5 faizini, yəni 5 min nəfəri ixtisar etməyi planlaşdırır.
Trend-in Yaponiyaya istinadən verdiyi məlumata görə, bu addım şirkətin zərərlə işləyən biznes sahələrini yenidən qurmaq məqsədi daşıyır.
İxtisarlar əsasən satış və idarəetmə bölmələrində olacaq və həm ölkə daxilində, həm də xaricdə tətbiq ediləcək. Şirkət erkən pensiya proqramları vasitəsilə bu prosesi həyata keçirməyi planlaşdırır.
Panasonic, həmçinin televizor istehsalı bölməsini satmağı və məişət texnikası, kondisionerlər və işıqlandırma sahələrində yenidən strukturlaşdırma aparmağı nəzərdən keçirir. Şirkət korporativ müştərilər üçün süni intellekt əsaslı xidmətlərə daha çox resurs ayırmaq niyyətindədir.
Şirkətin icraçı direktoru Kusumi Yuki bildirib ki, məqsəd dəyişən qlobal iqtisadi şəraitə daha çevik və davamlı cavab verməkdir.
Panasonic bu il üçün 53,7 milyard ABŞ dolları həcmində satış proqnozu verib ki, bu da ötən illə müqayisədə 7 faiz azalma deməkdir. Xalis mənfəətin isə 15 faizdən çox azalaraq 2,1 milyard dollara düşəcəyi gözlənilir. Şirkət bu proqnozlara ABŞ-ın keçmiş prezidenti Donald Trampın tətbiq etdiyi tariflərin mümkün təsirini daxil etməyib, bu isə faktiki nəticələrin daha da aşağı ola biləcəyini göstərir.