Bakı. Trend:
Macarıstan xarici işlər və xarici iqtisadi əlaqələr naziri Peter Siyarto İsrailin Qəzza zolağında apardığı hərbi əməliyyatlarla əlaqədar Avropa İttifaqının sanksiya tətbiq etmək niyyətini dəstəkləməyəcəyini açıqlayıb.
Trend-in məlumatına görə, bu barədə Siyarto israilli həmkarı Qideon Saar ilə telefon danışığından sonra bəyan edib.
Nazir bildirib ki, Macarıstan İsraillə HƏMAS arasında atəşkəsin əldə olunmasına və girovların, o cümlədən Macarıstan vətəndaşının azad edilməsinə ümid edir.
Siyartonun sözlərinə görə, mövcud vəziyyətdə dialoqun aparılması daha da vacibdir. O əlavə edib ki, iyulun 15-də Brüsseldə keçiriləcək Avropa İttifaqına üzv ölkələrin xarici işlər nazirlərinin görüşündə Aİ–İsrail Assosiasiya Şurasının fəaliyyətinin canlandırılması təşəbbüsü ilə çıxış edəcək.