Bakı. Trend:
ABŞ tənzimləyiciləri bazarda lider mövqeyə malik olan və piylənmənin ilk gündəlik oral müalicəsi sayılan "Wegovy" arıqlama dərmanının tablet formasını təsdiqləyiblər.
Trend xəbər verir ki, bu barədə “Euronews” məlumat yayıb.
FDA-nın qərarı "Novo Nordisk" şirkətinə piylənməyə qarşı həblərin bazara çıxarılması yarışında əsas rəqibi "Eli Lilly" üzərində üstünlük qazandırıb. "Eli Lilly"nin oral dərmanı olan orforglyprone isə hələ də nəzərdən keçirilir.
Hər iki preparat "GLP-1" qrupuna aid olub, geniş istifadə olunan inyeksiya dərmanları kimi iştaha və toxluq hissini tənzimləyən təbii hormonu təqlid edərək təsir göstərir.
Qeyd olunur ki, son illərdə "Novo Nordisk"in "Wegovy" və "Eli Lilly"nin "Zepbound" inyeksiyaları dünyada, eləcə də ABŞ-də piylənmənin müalicəsində mühüm dəyişikliklər yaradıb. Şirkət nümayəndələrinin bildirdiyinə görə, "Wegovy" tablet forması yaxın həftələrdə satışa çıxarılacaq.
Mütəxəssislər hesab edirlər ki, oral piylənmə dərmanlarının istifadəyə verilməsi bu sahədə müalicələrin əlçatanlığını artıracaq və xərclərin azalmasına töhfə verərək sürətlə böyüyən bazarın genişlənməsinə səbəb ola bilər.