Bakı. Trend:
İsrail Müdafiə Ordusu Livanın cənubundakı Deyr Zahrani yaşayış məntəqəsinin bir hissəsində yaşayan sakinlərə Hizbullah qruplaşmasına məxsus obyektə zərbələr endiriləcəyi ilə əlaqədar ərazini tərk etməyi əmr edib.
İsrail ordusu ərəb dilində "Teleqram" kanalında bildirib ki, Hizbullah tərəfindən İsrail qüvvələrinin istiqamətində “partlayıcı yüklü pilotsuz uçuş aparatının buraxılmasından” sonra təşkilata məxsus bir obyekt “hədəfə alınacaq”.
Hizbullaha məxsus “Əl-Mənar” televiziya kanalı daha sonra İsrailin Nabatiyə rayonunun Deyr Zahrani kəndinə hava zərbəsi endirdiyini bildirib. Kənd İsrail sərhədindən təxminən 20 kilometr məsafədə yerləşir. İsrailin bu xəbərdarlığı Livanda qüvvədə olan atəşkəsə baxmayaraq, bir neçə gün ərzində baş verən və çoxsaylı insan tələfatına səbəb olan bombardmanlardan sonra edilib.
Cümə günü axşam Livanın cənub və şərqinə endirilən zərbələr nəticəsində dörd nəfərin öldürülməsindən sonra İsrail bazar günü Nabatiyə bölgəsindəki bir neçə yaşayış məntəqəsini hədəfə alıb və nəticədə yeddi nəfər həlak olub. İsrail ordusu isə öz növbəsində Hizbullahın əsgərlərinə qarşı iki pilotsuz uçuş aparatı buraxmasına cavab verdiyini, insident nəticəsində hərbçilər arasında yaralanan olmadığını bildirib və bunu “atəşkəsin açıq şəkildə pozulması” kimi qiymətləndirib. Ordu bu zərbələrdən əvvəl bir neçə həftə ərzində ilk dəfə təxliyə əmri verərək Ərəb Salim kəndinin sakinlərindən ərazini tərk etməyi tələb edib.
Hizbullah mart ayından etibarən müttəfiqi İranı dəstəkləmək məqsədilə İsrailə qarşı hücumlar həyata keçirməklə Livanı regional münaqişəyə cəlb edib. Rəsmi məlumatlara görə, İsrailin cavab zərbələri nəticəsində 4 300-dən çox insan həlak olub.
