Bu il İordaniya kralı II Abdulla Qazaxıstana səfər etmək niyyətindədir. Bu barədə məlumatı Karaqandada regionun inzibati rəhbəri Hurlan Niqmatulinlə görüşündə İordaniyanın Qazaxıstandakı səfiri Abdulla Əl Ureykat bildirib.
"İnterfaks-Qazaxıstan" agentliyinin verdiyi məlumata görə tərəflər qarşılıqlı əməkdaşlıq barədə memorandum imzalayıblar.
"Mən sizin şəhərinizə İordaniya kralının tapşırığına əsasən gəlmişəm. Qazaxıstanın inkişafı İordaniyanı çox maraqlandırır. Biz sizin prezidentinizin apardığı ağıllı siyasəti bəyənirik və öz tərəfimizdən sizinlə əməkdaşlığa ümid edirik. Karaqanda vilayəti zəngin resurslara malik böyük bir ərazidir",-deyə İordaniya səfiri görüş zamanı bildirib.
N.Niqmatulin isə İordaniya tərəfinə Temuratu (Karaqanda vilayətində şəhər) sənaye parkının inkişafında iştirak etməyi təklif edib.
"Burda böyük layihələr həyata keçirmək və turist səfərləri hazırlamaq üçün geniş imkanlar var",-deyə vali bildirib.
Onun sözlərinə görə, bu il "Karaqanda-invest" adlı regional konfrans təşkil olunacaq. N.Niqmatulin İordaniya iş adamlarını da bu konfransa dəvət edib.
Trend-in ən mühüm və maraqlı xəbərlərini "Telegram"da izləyin
