Azərbaycan, Bakı, 21 sentyabr /Trend/
Azərbaycan Gənclər Fondu 20-21 sentyabr 2013-cü il tarixlərində Gənc Mühasiblər Birliyi ilə birlikdə Fonddan qrant almış təşkilatlar və fərdi şəxslər üçün müsahibatlıqla bağlı təlimlər keçirir. Bu barədə Trend-ə Azərbaycan Respublikasının Prezidenti yanında Gənclər Fondunun mətbuat xidmətindən bildirilib.
İlk təlim 20 sentyabr saat 17:00-da baş tutub. Təlimi giriş sözü ilə Gənclər Fondunun baş mühasibi Elmar Talıblı açıb. Təlimdə Fonddan qrant alan və maliyyə hesabatını düzgün təqdim etməkdə çətinlik çəkən təşkilatlar və gənclər üçün maliyyə hesabatı ilə bağlı lazımi məlumatlar verilib. Gənc Mühasiblər Birliyi adından çıxış edən Əfqan Səfərli Fondun sonuncu qrant müsabiqəsində qalib olmuş təşkilatlar və gənclər üçün büdcə formasının tərtibi, bölgüsü və s. digər mövzularda çıxış edib.
Daha sonra təlim iştirakçılarının sualları cavablandırılıb. Qeyd edək ki, bu gün 21 sentyabr saat 17:00-da növbəti təlim keçiriləcək.